भांगरभूंय | प्रतिनिधी
मनोरा, खबरां संस्था: वाशिम- महाराष्ट्र एक धक्को दिवपी घडणूक घडल्या. वाशिमच्या सोमठाणा गांवांत मालमत्तेच्या वादांतल्यान आपल्या नातवान आजी- आज्याचो खून केल्ल्याची म्हायती मुखार आयल्या. नातवान तीन इश्टांचे मजतीन आजी-आज्याचो खून केलो. उपरांत तांच्यो कुडी कोणाच्याच हाताक लागच्यो न्हय म्हणून तांणी तांचे हात-पांय बांदून त्यो धरणांत उडयिल्ल्यो. ह्या प्रकरणांत चार दुबावितांक अटक केल्या. तांणी गुन्यांवाची कबुलीय दिल्या.
वाशिमच्या मानोरा म्हालांतल्या इंझोरीच्या अडाण धरणांत दोन दिसां पयलीं अनवळखी मनशाची कूड सांपडिल्ली. ताचेर धारेच्या शस्त्रान वार केल्ल्याचें दिसतालें. पुलिसांनी सोद घेतले उपरांत सांपडिल्ली कूड सोमठाना गांवांतल्या प्रल्हाद वीर हाची आशिल्ल्याची समजलें. पुलीस ताच्या घरा पावले तेन्ना घराक कुलूप आशिल्लें. उपरांत पुलिसांक दुबाव आयिल्ल्यान पुलिसांनी ताच्या घरांत प्रवेश केलो तेन्ना तांकां रगताचे दाग सांपडले. ताचे वेल्यान ह्याच घरांत प्रल्हाद वीर हाचो खून जाल्ल्याचें स्पश्ट जालें.
प्रल्हाद आनी निर्मला वीर बेपत्ता आशिल्ल्यान तांचो खून जाल्ल्याचो दुबाव पुलिसांक आयलो. उपरांत तांचो नातू प्रतीक वीर हाका रातच्या वेळार पुलिसांनी ताब्यांत घेतलो. ताणें खून केल्ल्याचें आनी कुडींचो विलो लायिल्ल्याची कबुली दिली.
प्रतीक संतोष वीर, जग्गू देवकर, विकास भगत अशी दुबावितांचीं नांवां आसात. पुलिसांनी गुन्यांव करतना वापरिल्ली गाडीय जप्त केली. आतां निर्मला वीर हांची कूड पुलीस सोदतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
