भांगरभूंय | प्रतिनिधी
दिवचल, प्रतिनिधी ः साखळेची नगराध्यक्ष म्हूण सिद्धी प्रभु पोरोब हांची विरोधा विणें निवड जाली. हे खातीर मुख्यमंत्री डॉ. प्रमोद सावंत हांणी तांकां परबीं भेटयली. ह्या वेळार उपनगराध्यक्ष आनंद काणेकार, आदली नगराध्यक्ष रश्मी देसाय, मुखेल अधिकारी कबीर शिरगांवकार, निर्वाचन अधिकारी रोहन कासकार, नगरसेवक आनी हेर हाजीर आशिल्ले.
साखळे शार मॉडर्न सिटीच्या दिकेन वाटचाल करता. फाटल्या चवदा म्हयन्यांत पालिकेंत जायत्यो येवजण्यो चालीक लायल्यात आनी जायत्यो येवजण्यो आंखल्यात. नितळसाणे खातीर पालिकेक राष्ट्रीय पुरस्कार मेळिल्लो. तशींच कामगिरी दवरून, समाजीक वचनबद्धताय आनी जापसालदारकेची जाणविकाय करून हें आमचें शार हें जाणून घेवन नितळसाणेच्या आनी हेर गजालींनी दरेकल्यान योगदान दिवपाचें असो उलो मुख्यमंत्री डॉ. प्रमोद सावंत हांणी मारलो. हे खातीर सिद्धी पोरोब कार्यक्षम आसा आनी साखळें पालिकेक नवी दिका दिवपा खातीर नक्कीच वावुरतली असो विस्वास मुख्यमंत्री डॉ. सावंत हांणी उक्तायलो.
मुख्यमंत्र्याच्या मार्गदर्शना खाला सगल्या नगरसेवकांक आनी नागरिकांक विस्वासांत घेवन जायत्यो येवजण्यो चालीक लावपाचो यत्न करतली आनी आधुनीक दर्ज्याच्या शारां खातीर अभिनव येवजण्यो चालीक लावपाचो संकल्प आशिल्ल्याचे नगराध्यक्ष परोब हांणी सांगलें.
ह्या वेळार जिल्लो पंचायत वांगडी गोपाळ सुर्लकार आनी वेगवेगळ्या मळा वयल्या मानेस्तांनी सिद्धी परोब हांकां परबीं भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
