देशभरांत पावसाचो सांवार, न्हंयांचेर हुंवार

भांगरभूंय | प्रतिनिधी

२२ जाणांक मरण, ३० जाण बेपत्ता

नवी दिल्ली, खबरां संस्था: देशांतल्या चडशा राज्यांनी आतां मेरेन सरासरी परस चड पावस पडला. आयज २४ राज्यांनी व्हड प्रमाणांत पावस पडपाचो अदमास हवामान खात्यान उक्तायला. ओडिशांत पावस चालूच आसा. कटकांतल्या बाकीत शारांत ७ ऑगस्टाक ३१७ मिमी पावस रकलो.
हिमाचल प्रदेशांतूय पावस चालू आसा. बुधवाराय पालसणां कोसळिल्ल्यान राज्यांतले १०९ परस चड रस्ते बंद आसात. मंडीत ३७, शिमला २९, कुल्लू २६, कांगडा ६, किन्नौर- लाहौल- स्पीतींतले दरेकी ४, सिरमौरांतले २ आनी हमीरपूरचो अशें वट्ट १०९ रस्ते बंद आसात. विशेश म्हणल्यार अतिउत्साही पर्यटक थंय भोंवपाक गेल्यात. कुल्लू- मंडींत ढगफुटीक लागून २२ जाणांक मरण आयलां. ३० जाण अजून बेपत्ता आसात.

उत्तर प्रदेशांतल्या ६६ जिल्ह्यांनी उटंगाराचो पावस

अस्तंत राजस्थानांत फाटल्या तीन दिसांनी पावस पडून रेवेंत सुकिल्ले लुनी न्हंयेकूय उदक आयलें. बुधवारा सकाळीं ही न्हंय अजमेर आनी जोधपूर मार्गान बारमेरच्या रेंवट भागांत पावली, तेन्ना लोक नाचपाक लागले. सेगीत दुसरें वर्स हे न्हंयेंत उदक आयलें. लोकांनी प्रार्थना करून तिका येवकार दिलो.
लुनी न्हंय जिका राजस्थानची गंगा अशेंय म्हणटात, ती अजमेरच्या नाग पहारी हांगाच्यान वता. राज्यांतल्या ९ जिल्ह्यांतल्यान वचून ती गुजरातांत अरबी दर्याक मेळटा. लखनऊ- गोरखपुरा सयत उत्तर प्रदेशांतल्या ६६ जिल्ह्यांनी घोग्यांनी पावस पडटालो. मुरादाबादांतले रेल्वे ट्रॅक उदका पोंदाक गेले. प्रयागराजांतल्या १२०० घरांनी गंगेचें उदक भरलें. उदक संगमाचेर आशिल्ल्या हनुमान मंदिरा मेरेन पावलें. वाराणसींतले ५० परस चड घांट न्हंयेंत बुडल्यात.
मध्य प्रदेशांत सध्या पावस थारला. नर्मदेच्या उदकाची पातळी वाडिल्ल्यान इंदिरा सागर धरणाचीं १२ दारां आनी ओंकारेश्वर धरणाचीं ९ दारां उगडून तातूंत उदक सोडलां.

१४ राज्यांनी घोग्यांनी पावसाची शिटकावणी
हवामान खात्याच्या अदमासा प्रमाण, ९ ऑगस्टाक बिहार, अरुणाचल प्रदेश, आसाम आनी मेघालयांत घोग्यांनी पावस पडपाक शकता.
हिमाचल प्रदेश, उत्तराखंड, उत्तर प्रदेश, राजस्थान, अस्तंत बंगाल, सिक्कीम, ओडिशा, नागालँड, मणिपूर, मिझोराम, त्रिपुरा, कोंकण, गोंय, मध्य महाराष्ट्र आनी गुजरातांत व्हड पावसाची शिटकावणी दिल्या.