विनेश फोगटाची कुस्तींतल्यान निवृत्ती

भांगरभूंय | प्रतिनिधी

चंदिगड, खबरां संस्था: बायल कुस्तीपटू विनेश फोगट हांणी कुस्तींतल्यान निवृत्ती घेतली. एक पोस्ट घालून तिणें कुस्तीक ‘अलविदा’ केलां. कुस्ती सर्त म्हाका आवय भशेन. आयज हांव कुस्ती कडेन हारलें, अशें म्हणीत विनेश हांणी पोस्ट करून कुस्तींतल्यान निवृत्ती घेतिल्ल्याचें जाहीर केलें. ऑलिम्पिकचे कुस्ती सर्तींत निमाणे फेरी मेरेन पावली विनेश फोगाट हांचें वजन १५० ग्रॅम चड जाल्ल्यान तिका अपात्र थारायली. हाचे उपरांत विनेशान कुस्तींतल्यान निवृत्ती घेतली.

विनेश फोगटची पोस्ट

‘‘मॉं कुश्ती मेरे से जीत गई मैं हार गई। माफ़ करना आपका सपना, मेरी हिम्मत सब टूट चुकी है। इससे ज़्यादा ताक़त नहीं रही अब| अलविदा कुश्ती। २००१-२०२४ आप सबकी हमेशा ऋणी रहूँगी।’
’- चूक जाली आई कुस्ती आयज तूं जिखली आनी हांव हरलें. म्हाका माफ कर आई, तुजें सपन पुराय करपाची तांक आतां म्हज्यांत उरूंक ना. म्हज्यांत आतां तितलें बळगेंच उरूंक ना. अलविदा कुस्ती. २००१-२०२४ हांव कायमचें तुज्या रिणांत उरतलें. म्हाका माफ कर. अशें म्हणीत विनेश फोगाटान कुस्तींतल्यान निवृत्ती घेतली.

विनेशाक देड कोटी रुपयांचें इनाम

पॅरीस ऑलिम्पिकांत अपात्र थारले उपरांत हरियाणाची कुस्तीपटू विनेश फोगटान निवृत्तीची घोशणा केली. जरी विनेश ऑलिंम्पिकांत अपात्र थारली तरी आतां हरियाणा सरकारान व्हड निर्णय घेतला. हरियाणाचे मुख्यमंत्री नायब सैनी हांणी विनेशाक देड कोटी रुपयांचें इनाम दिवपाची घोशणा केल्या.