भांगरभूंय | प्रतिनिधी
प्रकाश वेळीपः आरक्षणा खातीर नवे जनगणेची गरज ना
भांगरभूंय । प्रतिनिधी
मडगांवः संसदेच्या दोनूय सभाघरांनी ह्याच मोसमांत एसटी आरक्षण विधेयक संमत जातलें आनी ताका लागून वेंचणूक आयोगाक अधिकार मेळटले. कायदो निर्मिती खातीर राष्ट्रपती कडेन धाडले उपरांत स म्हयन्यांच्या काळांत आरक्षण मेळटलें. ते खातीर परतून जनगणना करपाची गरज लागची ना, अशें उटाचें अध्यक्ष तशेंच आदले खासदार प्रकाश वेळीप हांणी सांगलें.
लोकसभेंत एसटी समाजाक आरक्षण दिवपाचे विधेयक सादर केल्ले खातीर उटा संघटणेन उपकार मानले. ह्या वेळार अध्यक्ष प्रकाळ वेळीप हांचे सयत विश्वास गावडे आनी हेर मानेस्त हाजीर आशिल्ले.
2003 त केंद्रांत आनी राज्यांत भाजपाचें सरकार आसतना एसटी समाजाक दर्जो मेळ्ळो. आतां परतून एकदां राजकी आरक्षण विधेयक सादर केलां. हे खेपे संसदेंत हाजीर रावपाची संद मेळ्ळी. गावडा, कुणबी आनी वेळीप समाजाक आरक्षण मेळचें, हे खातीर उटा संघटणे कडल्यान यत्न केल्ले. उटा संघटणे कडल्यान 20 वर्सांची प्रलंबीत मागणी पुराय केल्ले खातीर केंद्रांतल्या आनी राज्यांतल्या भाजपा सरकाराचे उपकार मानतात, अशें वेळीप हांणी सांगलें. ह्याच संसदेच्या अधिवेशनांत लोकसभा आनी राज्यसबा अश्या दोनूय सभाघरांनी हें विधेयक संमत जावन राष्ट्रपती कडेन कायदो निर्मिती खातीर वतलें, अशीय अपेक्षा तांणी उक्तायली. हाचें स्रय हे उटाच्या बाळ्ळींतल्या आदोलनांतल्या शहिदांक दिवपाक जाय, अशेंय तांणी सांगलें. एसटी आरक्षणाक कळाव कित्याक जालो हाचो अभ्यास केलो तेन्ना पिपल्स अॅक्ट 1950 आनी पिपल्स अॅक्ट 1951 प्रमाण वेंचणूक आयोगाक एकादो मतदारसंघ आरक्षीत दवरपाचो अधिकार 2008 मेरेन दिल्लो. ते उपरांत ह्या कायद्या प्रमाण डिलिमिटेसन समिती स्थापन करून आरक्षण दिवपाचे अधिकार नाशिल्ले. ताका लागून आतां नव्या कायद्या प्रमाण वेंचणूक आयोगाक परतून अधिकार मेळटले. कायद्यांतल्या बदलाक लागून आरक्षण मेळोवपांतल्यो आडखळी पयस जातल्यो. 2001 चे जनगणने प्रमाण गोंयांत एसटी समाजाची लोकसंख्या 1.33 लाख आशिल्ली. म्हणल्यार लोकसंख्येचे 9.9 टक्के आशिल्ली. ताचो वापर करून वेंचणूक आयोगा कडल्यान चार मतदारसंघ आरक्षीत करपाक शकतात. परतून जगगणना करपाची गरज लागची ना. विधेयका प्रमाण कायदो निर्मिती जाले उपरांत चार ते स म्हयन्यांच्या काळांत आरक्षणाची फुडली प्रक्रिया करपाक शकतात. फुडले विधानसभा वेंचणुकेक अडेज वर्सांचो काळ आसा. ते मेरेन एसटी समाजाक आरक्षण मेळपाक शकता, अशें वेळीप हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
