भांगरभूंय | प्रतिनिधी
पणजीः केंद्राचे स्वदेश दर्शन येवजणे खाला गोंयांत 316 कोटी रुपया खर्च करून पर्यटन खात्यान सुविधा उबारल्यात. हे येवजणे खाला 31 साधन सुविधांची उबारणी, सोबितीकरण आनी हेर उदगरतीचीं कामां गोंयभर हातांत घेतल्यात, अशी म्हायती पर्यटन मंत्री रोहन खंवटे हांणी लेखी जापेंत दिल्या.
स्वदेश दर्शन येवजणे खाला गोंयच्या पर्यटन खात्यान कितलो लाव घेतला, असो प्रस्न साळगांवचे आमदार केदार नायक हांणी विचारिल्लो. हाचेर पर्यटन मंत्र्यान विधानसभेच्या पटलार म्हायती दिल्या.
दोन पांवड्यांनी स्वदेश दर्शन येवजणे खाला गोंयांत पर्यटनाचीं उदरगतीचीं कामां हातांत घेतल्यात. पयल्या पांवड्यार 205 कोटी रुपया मोडून 16 कामां पुराय जाल्यांत. जाल्यार दुसऱ्या पांवड्यार 110 कोटी मोडून 15 कामां पुराय केल्यांत. पर्यटन मंत्रालयान जारी केल्ली स्वदेश दर्शन ही केंद्रीय अनुदानीत येवजणेचे अंमलबजावणी सर्कीट 1 आनी 2 त केल्या. धोरणात्मक सुदारणा करून पर्यटन आनी संबंदीत सुविधा, पर्यटन सेवा, मनीस भांडवल उदरगत, डेस्टिनेशन मॅनेजमेंट आनी प्रसिध्दी हे विशय हातांत घेवन शाश्वत आनी जापसालदार पर्यटन तयार करप हे येवजणेचें एकंदरीत मिशन आसा.
पर्यटकांक गोंयचें गिरेस्त सांस्कृतीक दायज अणभवपाक मेळटलें. हे येवजणेची अंमलबजावणी जाली जाल्यार फावो तितली साधनसुविधा उबारपाक मजत जातली आनी गोंयांत पर्यटकांचो आकडो वाडटलो. एकंदरीत उदरगतींत थळाव्यांक स्वंय रोजगार मळोवपाक, कुशळटाय उदरगतीक उर्बा दिवपाक आनी गोंया खातीर येणावळ जोडून दिवपाक मजत जातली. गोंयांत शाश्वत आनी रिजनरेटीव्ही पर्यटनाचे उदरगतीचेर लक्ष दिवन आध्यात्मीक, दायज आनी संस्कृतीक तशेंच सैमीक पर्यटन हो ट्युरीजम मास्टर प्लॅन पर्यटन धोरणा खाला नोंद केल्यात. तशेंच पर्यटन सर्कीट आनी सैम आधिकारी क्लस्टर, गोंयांतल्या कलाकारांची कला दाखोवपी गोवा हस्तकला आनी युनिटी मॉलाची उदरगत, पोरणे गोंय इगर्जेतं सुविधांची उदरगत, दायज थळां, शिवाजी महाराज डिजिटल संग्रहालयाची उदरगत, एकदस तीर्थाची प्रसिध्दी, गावगिऱ्यां वाठारांत सुविधा दिवपा खातीर कारावेन पर्यटनाची उदरगत तशेंच सांस्कृतीक, दायज, इतिहासीक, सैमीक मालमत्ता तिगोवन दवरपा खातीर ग्राम उदरगत येवजण, धर्मीक थळांचेर सुविधांची उदरगत येवजण हे सारकिल्ले उपक्रम ह्या खाला हातांत घेतल्यात, अशी म्हायती जापेंत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
