भांगरभूंय | प्रतिनिधी
पणजी : आमदार डॉ. चंद्रकांत शेट्ये हांणी ‘राज्यांत ड्रग्साचो हॉटस्पॉट आसा?’ ह्या प्रस्नाक जाप दितना मुख्यमंत्री डॉ. प्रमोद सावंत हांणी, फाटल्या साडेपांच वर्सांनी राज्यांत घुवळें वखदां संबंदी ८५२ गुन्यांव नोंद जाल्यात. हातूंत ९८७ जाणांक अटक केल्या. अटक केल्ल्या मदले ७५ टक्के दुबावीत १८ ते ३५ पिरायेच्या गटांतले आशिल्ल्याचें विधानसभा अधिवेशनांतल्या लेखी प्रस्नाक दिल्ले जापेंतल्यान उक्तें जालें.
मुख्यमंत्र्यानी मुखार म्हणलें, ड्रग्साचो हॉटस्पॉट अशें राज्यांत निश्चीत ठिकाण ना. मात दर्यादेग वाठारांनी व्हडा प्रमाणांत देशी-विदेशी पर्यटक येत आसतात. ताका लागून हांगा घुवळे वखदांच्या वेव्हारा संबंदी प्रकरणां भायर येतात.
आमदार शेट्ये हांणी गोंयांक घुवळे वखदां मुक्त राज्य करपा खातीर राज्य सरकार कशे तरेन यत्न करतात, असोय प्रस्न केल्लो. ताचेर राज्याक घुवळे वखदां मुक्त राज्य करपा खातीर राज्याचें पुलीस खातें पुरायेन यत्न करता. ताका लागून गुन्यांव नोंद करून दुबावितांक अटक करतात. राज्यभर जागृतायेचेर भर दिल्ल्याचेंय मुख्यमंत्र्यान नमूद केलें.
साडेपांच वर्सांचे गुन्यांव (१५ जून मेरेन)
| वर्स | गुन्यांव |
| २०१९ | २१९ |
| २०२० | १४८ |
| २०२१ | १२१ |
| २०२२ | १५४ |
| २०२३ | १४० |
| २०२४ | ७० |
| वट्ट | ८५२ |
पिराये प्रमाण अटक केल्या
| वर्स | पिराय १८-३५ | पिराय ३६-६० | ६० वर्सा वयले |
| २०१९ | १८७ | ५१ | ४ |
| २०२० | १२८ | ४५ | ४ |
| २०२१ | १०२ | ३३ | ३ |
| २०२२ | १४७ | ४० | २ |
| २०२३ | १२३ | ४० | २ |
| २०२४ | ५८ | १६ | २ |
तीग नेण्टे पिरायेच्या भुरग्यांचो आसपाव
फाटल्या साडेपांच वर्सांच्या काळांत घुवळे वखदांचे तस्करींत तीन नेण्टे पिरायेच्या चल्यांचो आसपाव आशिल्ल्याचें समजलां. २०१९ त न आनी २०२३ एका नेण्ट्या चल्याचेर कारवाय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
