भांगरभूंय | प्रतिनिधी
फुडल्या अधिवेशनांत हाडटले कायदो : मुख्यमंत्री
पणजी ः हेडग्या गोरवांक लागून अपघात जावन मरण आयल्यार संबंदीत गायेच्या धनयाचेर गुन्यांव नोंद करपाचो कायदो फुडल्या अधिवेशनांत हाडटले अशें मुख्यमंत्री डॉ. प्रमोद सावंत हांणी बुधवारा विधानसभ सभाघरांत सांगलें.
आमदार विजय सरदेसाय हांणी प्रस्न-जाप वेळार हे संबंदी प्रस्न मांडलो. फाटल्या पांच वर्सांत राज्यांत हेडग्या गोरवांक लागून 73 वाहन अपघात जाल्यात. तातूंत 13 वाहन चालकांक मरण आयलें. अशा अपघातांत फकत वाहन चालकांचेर गुन्यांव नोंद जातात. पूण गोरवांच्या धनयांचेर कसलीच कारवाय कित्याक जायना असो प्रस्न आमदार सरदेसाय हांणी उप्रासलो. ताचेर जाप दितना मुख्यमंत्री डॉ. सावंत हांणी सागलें, कामधेनू येवजणे खाला घेतिल्लीं वा वैयक्तीक विकतीं घेतिल्ल्या गायांचे दुद काडले उपरांत तांचे धनी तांका रस्त्यार सोडून दितात. तांकां लागून अपघात जावन गायेक मरण आयले जाल्यार संबंदीत वाहन चालकांकडल्यान लुकसाण भरपाय घेतात. पूण चालकाक मरण आयले जाल्यार गाय आपली आसा अशें तें म्हणनात. हाचेर उपाय करपा खातीर कामधेनू येवजणे खाला घेतिल्लीं गाय रस्त्यार मेळ्ळीं जाल्यार तांच्या धनयां कडल्यान येवजणे खाला घेतिल्ल्यो गाय परत घेवपाचो आनी तांकां येवजणेचो फायदो दिवचे ना अशें सरकारान पयलींच थारायलां. हाचें फुडें आतां कामधेनू येवजणे खाला लागून वा वैयक्तीक विकतें घेतिल्ल्या गायांक लागून अपघआत जावन चालकाक मरण आयल्यार संबंदीत गायेच्या धनयाचेर गुन्यांव नोंद करपाचो कायदो फुडल्या अधिवेशनांत हाडटले अशें मुख्यमंत्री डॉ. प्रमोद सावंत हांणी सांगलें.
मजगतीं, वैयक्तीक गाय घेतिल्ल्या शेतकारांकय कामधेनू येवजणेचो लाव दितले. हाचे भायर हेडग्या गोरवांचेर नियंत्रण हाडपा खातीर सरकारी जमीन लीजाचेर दिवन गो- शाळांची थापणूक करपाचो विचार सरकारान सुरू केला असोय उल्लेख तांणी केलो.
धोरण घटमूट करया: हळर्णकार
हेडगी गोरवां आनी रस्याद सुण्यां संबंदी फुडल्या तीन म्हयन्यांत धोरण तयार करपाचो निर्णय राज्य सरकारान पयलींच घेतिल्लो. हेडग्या गोरवांक लागून अपघात जाल्यार कारवाय करपा खातीर पशुपालन खात्यान अजून कायदो केल्लो ना. पुलीस खातें तांच्या कायद्या प्रमाण कारवाय करता. पूण हे बाबतींत धोरण तयार जाले उपरांत तें चड घटमूट जातलें अशें पशुपालन मंत्री नीळकंठ हळर्णकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
