भांगरभूंय | प्रतिनिधी
अॅड. आयरीश रॉड्रिग्ज हांची खंडपिठांत याचिका
भांगरभूंय I प्रतिनिधी
पणजी : आदले मुख्यमंत्री प्रतापसिंह राणे हांकां आजीवन कॅबिनॅटाचो दर्जो दिवपा विशीं सामाजीक कार्यकर्ते अॅड. आयरीश रॉड्रिग्ज हांणी मुंबय उच्च न्यायालयाच्या गोंय खंडपिठांत आव्हान दिलां. हे याचिकेंत तथ्य आशिल्ल्याचें निरिक्षण नोंद करून न्या. महेश सोनक आनी न्या. आर. एन. लड्ढा ह्या दोन वांगड्यांच्या खंडपिठान याचिका दाखल करून घेतल्या.
ह्या प्रकरणाची फुडली सुनावणी 2 मे दिसा दवरल्या. ह्या वेळार संबंदीत अधिसुचोवणेक स्थगिती दिवपा विशीं अंतरीम निवाड्याचेर सुनावणी जातली.
गोंय सरकारान 7 जानेवीर 2022 दिसा अधिसुचोवणी जाली करून आदले मुख्यमंत्री प्रतापसिंह राणे हांकां आजीवन कॅबिनॅटाचो दर्जो दिला. हाका सामाजीक कार्यकर्ते अॅड. आयरीश रॉड्रिग्ज हांणी हरकत घेवन मुख्य सचिवांक कायदेशीर नोटीस धाडिल्ली. तशेंच ह्या प्रकरणांत सात दिसांत अधिसुचोवणी फाटीं घेतलीना जाल्यार उच्च न्यायालयांत वतलो, अशी शिटकावणीय दिल्ली. अशें आसतना ताचे उपरांत कितेंच जावंक नाशिल्ल्यान रॉड्रिग्ज हांणी खंडपिठांत याचिका दाखल करून वयल्या निर्णयाक आव्हान दिलां. हे याचिकेंत रॉड्रिग्ज हांणी राज्य सरकाराक प्रतिवादी केला. ह्या प्रकरणाची सोमारा सुनावणी जाली, तेन्ना रॉड्रिग्ज हांणी वयलो मुद्दो खंडपिठांत उपस्थीत केलो. तशेंच अशाच प्रकरणांत खंडपिठांत 2007त जनहीत याचिका दाखल केल्ली आनी 22 जानेवारी 2009 दिसा जाल्ल्या निवाड्याचो उल्लेख केला.
ते भायर राणे हांचे सेवेक 12 कर्मचाऱ्यांची वेवस्था करतले. ते खातीर वर्सुकीं 90 लाख रुपया खर्च येतलो, अशी म्हायती आयरीश हांणी खंडपिठांत दिली. हाची दखल घेवन खंडपिठान वयले निरिक्षण नोंद करून फुडली सुनावणी 2 मे दिसा दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
