भांगरभूंय | प्रतिनिधी
नवी दिल्ली, खबरां संस्था: केंद्र सरकारान अर्थसंकल्पांत म्हत्वाची दुरुस्ती केल्या, २३ जुलया पयलीं घरां विकतीं घेतिल्ल्या व्यक्तींकूय दिर्घकाळ भांडवल नफ्याचेर (एलटीसीजी) करा खातीर दोन पर्याय उपलब्ध आसतले. अर्थसंकल्पांत एलटीसीजीचेर १२.५ टक्के सरसकट कर लावपाचें प्रस्तावीत केल्लें. ताचेर टिका जाले उपरांत सरकारान एक पावल फाटीं घेतलें. १२.५ टक्के सपाट कर दितना सरकारान ‘इंडेक्सेशन’चो फायदो काडून उडयल्लो.
अर्थसंकल्प सादर केल्ले तारखे सावन म्हळ्यार २३ जुलय सावन नवे दर लागू जातले अशेंय स्पश्ट केलें. ताका लागून करदात्यांचेर भार वाडटलो असो भंय कर तज्ञांक आशिल्लो. तशेंच मालमत्ता गुंतवणूकदार आनी सामान्य गिरायकां उबगल्लीं. हें मतींत दवरून सरकारान अर्थसंकल्पांत बदल करपाचो प्रस्ताव मांडला. हाचे प्रमाण हिंदू अविभाजीत कुटुंबाची मालमत्ता विकपाची आसल्यार ताका ‘इंडेक्सेशन’च्या फायद्यान २० टक्के दरान कर भरचो पडटलो आनी तो फायदो घेवपाचो ना जाल्यार ताका १२.५ टक्के दरान कर भरचो पडटलो. देखून करदात्यांक दोगांयची तुळा करूं येता आनी खंयचो पर्याय उणो आसा तो वेंचूंक मेळटा. तशेंच नवे दुरुस्ती प्रमाण २००१ वर्सा पयलीं विकत घेतिल्लें वा दायज हक्कान मेळिल्ले मालमत्तेचेर इंडेक्सेशनचो लाव कायम दवरून कर भरपाक मेळटलो.
हे सुदारणेक लागून करदात्यांची चिंता उणी जातली. ते चड फायद्याचे वेवस्थेची निवड करपाक शकतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
