कारवार- गोंयच्या राष्ट्रीय म्हामार्गा वयलो पूल कोसळ्ळो
भांगरभूंय | प्रतिनिधी
बम्मू फोंडे, कारवार: कारवार- गोंयच्या राष्ट्रीय म्हामार्ग ६६ चेर कोडीबागचे काळी न्हंयेचेर आशिल्लो ४१ वर्सां आदलो पूल रातीं सुमार १ वरांचेर कोसळ्ळो. तेन्ना ह्या पुला वेल्यान वचपी तमिळनाडूचो ट्रक न्हंयेंत गेलो. मात ट्रकांत आशिल्ल्या चालकाचो जीव वाटावपाक पुलिसांच्या सादुरपणाक लागून येस आयलें.
चड म्हायती प्रमाण, पूल कोसळिल्ल्याचो अदमास येवंक नाशिल्ल्यान पुलावेल्यान वचपी एस एस एम ट्रान्सपोर्ट कंपनीचो (TN 52 C 6880) ट्रक ब्रिजावेल्यान वतना काळी न्हंयेंत कोसळ्ळो. तेन्ना ह्या ट्रकांत चालक बाल मुरुगन (३७ ) आशिल्लो. मात ट्रकाच्या कॅबिनाचो ग्लास फुटिल्ल्यान केबिनाचेर उबो रावन चालकान आवाज दिलो. ताचो आवाज लागींच आशिल्ल्या पुलिसांनी आयकलो आनी ते रोखडेच घडणुके सुवातेर पावले. तांणी एसपी कार्यालयांत हे विशीं म्हायती दिली. पुलिसांचो पंगड घडणुके सुवातेर दाखल जालो. थळावे नुस्तेंमार आनी पुलीस कर्मचार्यांनी बोटीचे मजतीन लॉरी चालकाक वाटयलो. चालकाक उपचारा खातीर हॉस्पिटलांत दाखल केला. कोसळिल्ल्या पुला कुशीक आनीक एक पूल आसा. सध्या त्या पुलावेल्यान येरादारी सुर दवरल्या. हो पूल कोसळिल्ल्यान आनीक वाहनां न्हंयेंत पडिल्ल्याचो दुबाव आसा. ताका लागून न्हंयेंत सोद घेवप चालू आसा.
https://www.facebook.com/bhaangarbhui/videos/1008756977613866
काळी न्हंयेवेलो हो पूल ४१ वर्सां आदीं बांदिल्लो. हो पूल कोसळपाचे स्थितींत आशिल्ल्याच्यो कागाळी जायते फावट नागरीकांनी केल्ल्यो. तशेंच हे विशीं बातम्योय प्रसिद्ध जाल्ल्यो. हाचे कडेन आडनदर करून ह्या पुला वयल्यान येरादारी चालूच दवरिल्ली. हे घडणुके विशीं राष्ट्रीय म्हामार्ग प्राधिकरण आनी एनएच ६६ चे कत्राटदार आयआरबी कंपनी आड कारवार शार पुलीस स्टेशनांत गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
