भांगरभूंय | प्रतिनिधी
समाजांत गरिबांक न्याय- नीत मेळटाच अशें ना. दुडू आशिल्लो समाज आयज कितेंय विकतें घेवंक शकता. न्याय, नीत, सत, मनीसपण, प्रामाणीकपण दुडवां पोंदा लिपयता. गरीब मात थंयच उरता. असो गरिबांचो जावपी घुस्मटमार प्रेक्षकांच्या नदरे मुखार हाडपी खडेगांठ कांतोरिस्ट सेबी दे दिवार जांची आयज कोंकणी तियात्र पालकार ‘स्मार्ट बॉय’ म्हूण वळख आसा, तांचो ‘कोणाचे चुकीक लागून?’हो सवो तियात्र. एम. ए. च्या अभ्यासक्रमांत आमी ‘वेवसायीक तियात्र : एक अभ्यास’ हो पेपर शिकतात. ह्या संदर्भांत हो तियात्र पळयलो.
एकाच कुटुबांचे दोन वांटे करून भाव- भाव सेपाराद रावतात. एकलो भाव गरीब जाल्यार दुसरो गिरेस्त. मरुन गेल्ल्या गिरेस्त भावाच्या पयशांचेर ताची बायल (आंतोनेत दे मायणा) आनी ताची भुरगीं (जॉयलिटा, फ्रेंकी) फोल्गी जीण जगतात. पार्टी, ड्रग्स्, दुसऱ्यांची खेबाडां करप हें तांचें सदचेंच जाता. गरीब भावाची (पास्कोल) भुरगीं (जॉयनिसिया, फ्रेझर) विलचेरार आसून लेगीत बरीं शिकतात. तांचे हावेस व्हड. अशे कठीण परिस्थितींत लेगीत तांचो देवाचेर भावार्थ उणो जायना. एका दिसा दोगांय घरांत एकटी आसताना तांचे सवे मिलाग्र जावन तीं परत आपल्या पांयार उबीं रावतात, शिकप पुराय करून कामाक लागतात. तांची जीण सुदारता. इतल्यान तांका परत अपघात जावन तीं मरतात. जाण्ट्या आवय (रोमा) बापायक आपलो आदार पयस जाता. ज्या गिरेस्तांक लागून हें घडटा तांचेर कोण कारवाय करना. ही चूक कोणाची? असो प्रस्न सेबीन ह्या तियात्रांतल्यान आमकां विचारला.
कांतार तियात्राचें खाशेलें आंग. सोलो, डुवेट, दुवो, त्रियो, चोवको अशे सगळे प्रकार सादर जाल्यात. झेवियर गोमस् हांणी आपल्या कांतारातल्यान गोंयचो मोग जागयला आनी सरकारा कडेन गोंयकारांक ड्युएल सिटीजनशीप दिवची म्हूण विनवणी केल्या. आपल्या दोळ्यांत मुसळ आसताना, दुसऱ्यांच्या दोळ्यांतलें किसळ सोदचें न्हय असो विशय घेवन बायल पात्रांनी खूब बरो त्रियो गायला. कॉ. मायरन (ज्युनियर सेल्वी), कॉ. डेवीड, कॉ. पाद्री आशलीफ (सर्गेस्त कॉ. सेल्वीचो भाचो) हांणी सेल्वीची नक्कल करून गायिल्लो त्रियो प्रेक्षकांक खूब आवडलो. तिगूय सेल्वी भशेन दिसतात, गायतात, नक्कल करतात आनी तियात्र मोग्यां भितर सेल्वीच्यो यादी जागयतात.
तियात्रांत पोलिटिकल कांतारां आयले बगर रावनात. सेबी हाकाच लागून तर फामाद. एका चोवक्यांतल्यान आपणाचेर केस करूंक सोदप्यांक तो कसो जाप दिता तें बेस बरें आयलां. ह्याच कारणाक लागून ताका ‘स्मार्ट बॉय’ हें नांव पडलां जायत.
सायड शो तियात्राचो एक घटक. कॉ. एस सेली, कॉ. सेमिका, कॉ. रिचर्ड, कॉ. डेवीड आनी कॉ. मायरन हांणी प्रेक्षकांक पोटांत दुखसर हांसयलीं. पूण मुखेल कथानकांतूय विनोद हाडून कथानक खंय तरी उणें पडलां. बाणस्तारी जाल्ले घडणुकेचेर हो तियात्र सादला. सेबीन वास्तवीक घडणूक लोकां मुखार हाडली. पूण, मुखेल कथानकाचेर आनीक भर घाल्लो जाल्यार तियात्र आनीक उठून येवपाचो. तरीय एका गरीब मनशाची आयची स्थिती ह्या तियात्रांत मांडून तांणें गोंयकारांक प्रस्न केला.
नाजारेत, सेनोन, मानुएल, एश्बन, सिबन आनी लिनॉय गोमेंडीस् हांणी बरें मुज्ग वाजोवन तियात्राक नेट दिला.
रॉशेल गुदिन्हो
सरकारी महाविद्यालय, केपें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
