भांगरभूंय | प्रतिनिधी
कार्यवाही खातीर आतां मेरेन ६ अधिसुचोवण्यो
पणजी, प्रतिनिधी : राजभास कायदो १९८७ च्या कार्यवाही विशीं फाटल्या ५ वर्सांत राजभास संचालनालया कडेन फकत एक निवेदन आयलां. सरकारी खातीं तशेंच भौशीक मळार कोंकणीचो वापर जावचो म्हूण सरकारान ६ अधिसुचोवण्यो जारी केल्यात. आमदार विरेश बोरकार हांच्या प्रस्नाक राजभास खात्याचे मंत्री ह्या नात्यान मुख्यमंत्री डॉ. प्रमोद सावंत हांणी ही लेखी जाप दिल्या.
राजभास कायद्या प्रमाण देवनागरी लिपींतली कोंकणी भास ही गोंयची राजभास आसा. कोंकणीच्या वापरा खातीर जशो ६ अधिसुचोवण्यो जारी जाल्यात तशोच ६ अधिसुचोवण्यो मराठीच्या वापरा खातीर जारी जाल्यात. कोंकणी सयत मराठीचो वापर करपाचीय मेकळीक राजभास कायद्यांत आसा. हाका लागून मराठीच्या वापरा खातीरय ६ अधिसुचोवण्यो जारी जाल्यात. कार्यावळीच्यो सगळ्यो पत्रिका कोंकणी, मराठी, हिंदी आनी इंग्लिश भाशेंतल्यान जारी जातात. खंयच्याय खात्या कडल्यान प्रस्ताव आयलो जाल्यार कागदपत्रांचो कोंकणीतल्यान अणकार करपाची वेवस्था राजभास संचालनालय करता. संकेतथळाचो मजकूरय कोंकणींतल्यान तयार करपाची प्रक्रीया सुरू जाल्या.
कोंकणी खातीर कार्य करपी संस्थांक सरकार दर वर्सा अनुदान दिता. गोवा कोंकणी अकादेमी, दाल्गाद कोंकणी अकादेमी, कोंकणी भाशा मंडळ आनी अ. भा. कोंकणी परिशद ह्या संस्थांक सरकार अनुदान दिता.
शिक्षणीक संस्था तशेंच साहित्यीक संस्थां मदीं कोंकणीक उर्बा दिवपा खातीर कार्यावळी जातात. कोंकणी भाशेंत दर्जेदार कथा, साहित्य निर्माण करता, तांकां पुरस्कार दिवपाची येवजण सुरू जाल्या.
राजभास खात्यांत भाशा संशोधन फांटो सुरू जालो. ह्या फांट्या वरवीं गावांची नांवां कोंकणींतल्यान करपाची प्रक्रीया सुरू जाल्या.
कोंकणी भाशेंतल्यान अभ्यासक्रमाचीं पुस्तकां तयार जावचीं म्हूण केंद्रीय भारतीय भाशा संस्था, म्हैसूर हांचे कडेन गोंय सरकारान कबलात केल्या. विज्ञान, तंत्रज्ञान परिभाशा आयोग, नवी दिल्ली आनी राजभास संचालनालय हांचे कडल्यान कोंकणींतल्यान तांत्रीक शब्दकोश तयार करपाची प्रक्रीया सुरू आसा. राजभास कायद्याचे कार्यवाही खातीर सुरू आशिल्ल्या उपक्रमांची म्हायती जापेंत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
