भांगरभूंय | प्रतिनिधी
चाळीस वर्सां उपरांत बायलां मदीं भलायकेच्यो जायत्यो कागाळी वाडटात. हार्मोन बदला सयत रजोनिवृत्तीचो हो काळ आसून ताचो परिणाम शारिरीक वेदने वांगडाच बायलांचे मानसीक भलायकेचेरुय जाता. दिसपट्ट्या कामांत बायलो आंगाचेर वेदना जातात ताचे कडेन आडनदर करतात आनी मागीर व्हड समस्या निर्माण जातात. अशा वेळार योग्य आहार, व्यायामा वांगडाच कांय गरजेच्यो वैजकी चांचण्यो वेळार करप गरजेचें आसता.
स्तनाची तपासणी, मॅमोग्राम चांचणी
थानांचो कॅन्सर हें भारतांत मरण येवपाचें एक मुखेल कारण. पिराये प्रमाण थानांच्या कॅन्सराचो धोको वाडटा. देखून दरेक बायलेन मॅमोग्राम/ अल्ट्रा सोनोग्राफी करप गरजेचें. हें दुयेंस वेळार कळ्ळें जाल्यार योग्य उपचार करप शक्य जाता. कोणाकूय दुबाव आसल्यार तांणी ही चांचणी करची.
शुगर चांचणी
बायलांक पिरायेच्या 15 वर्सां सावन गोडेंमूत जावपाचो धोको आसता. ताचेर नियंत्रण दवरपा खातीर रगतांतल्या ग्लुकोजाची तपासणी करप गरजेचें आसता. जाका लागून गोडेंमूत वा प्री-डायबेटिस वळखुपाक मेळटा. ही चांचणी चाळीस पिराये उपरांत करची.
थायरॉयडाची चांचणी
बदलपी जिणे पद्दतीक लागून बायलां मदीं थायरॉयडाची समस्या वाडल्या. 5 बायलां मदल्या 3 बायलांक थायरॉयड दुयेंस जावपाचो धोको आशिल्ल्यान वर्साक एक फावट तरी थायरॉयडाची चांचणी करप म्हत्वाचें. थायरॉयडाचो धोको दादल्या परस बायलांक चड आसता. सेगीत वजन वाडप वा उणें जावप हें थायरॉयडाचें कारण आसूं येता. TSH, T3, T4 पातळी तपासप गरजेचें. हें जाणून घेवपा खातीर थायरॉयडाची चांचणी करपाचो सल्लो दितात.
पेल्विक तपासणी आनी पॅप स्मीयर
पिरायेच्या 40 वर्सां उपरांत पेल्विक तपासणी करपाचो सल्लो दितात. भारतांतल्या बायलांक मरण येवपाचे मुखेल कारण गर्भाशयाचो कॅन्सर. ह्या नेटान वाडपी कॅन्सराचें प्रमाण व्हड आसा आनी दर वर्सा लाखांनी बायलांक ह्या कॅन्सराक लागून मरण येता. देखून बायलांनी ही चांचणी करुन घेवप गरजेचें अशें दोतोर सांगतात.
आनुवंशिक चांचणी
अनुवंशीक चांचणेंत आनुवंशिक दुयेंस सोदून काडटात. हातूंत रगताच्या नमुन्यांची चांचणी करतात. कुटुंबांतल्या कोणाकूय आनुवंशिक दुयेंस आसल्यार जल्माक आयिल्ल्या भुरग्यांची चांचणी करून रोखडोच हो दुयेस सोदून काडूंक मेळटा.
सीबीसी चांचणी
हालींसराक जायत्या बायलां मदीं हिमोग्लोबीनाची उणीव दिसून येता. हिमोग्लोबीनाच्या उणावाक लागून कुडींत जायते दुसेंय जावपाचो धोको आसता. देखून बायलांनी सीबीसी चांचणी करची. हाचे वरवीं प्लेटलेट्स, प्लाझ्मा आनी हिमोग्लोबीन हांची पातळी जाणून घेवपाक आनी योग्य उपचार करपाक मजत जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
