भांगरभूंय | प्रतिनिधी
मडगांव, प्रतिनिधी ः वाडी- बाणावले दर्यांत मंगळारा सकाळीं परतून नुस्तेंमारी बोट उमथली. बोटीचेर आशिल्ले 11 नुस्तेकार पेंवून दर्यावेळेर पावले. तशेंच बोट परत दर्यावेळेर हाडपाक येश आयलें.
मेळिल्ले म्हायती प्रमाण, मंगळारा सकाळीं 9:30 वरांचेर बोट उमथली. वायट हवामानांत लेगीत नुस्तेंमारी करपाक वचप नुस्तेकारांक म्हारग पडलें. पोपू उर्फ ग्रेफीन्स फर्नांडीस हांचे मालकीची मिनिनो जिझस नांवाची बोट 11 नुस्तेंमारां सयत सुमार शंबर मीटर दर्यांत व्हड ल्हारांक लागून उमथली.
सगळे नुस्तेकार आंध्र प्रदेश आनी झारखंडांतले आसून ते पेंवून दर्यावेळेर पावले. कांय दिसां आदीं ग्रेफिन्स हांची बोट बाणावले दर्यावेळेर उमथिल्ली तेन्ना तांतूतल्या 13 नुस्तेमारांक पुलीस, लायफगार्ड आनी नुस्तेकारांनी वाटायल्ले. बोट उमथले उपरांत थळाव्या नुस्तेकारांनी बोटीक दोरी बांदून बारा वरांचेर दर्यावेळेर हाडली.
वायट हवामानांत लेगीत बोटी दर्यांत व्हरतात ताका लागून हे प्रकार घडत आसात. देखून नुस्तेंमारीचो हंगाम सुरू जालो तरी कसलीच वायट घडणूक घडचे पयलीं नुस्तेमारी खात्यान योग्य सुचोवण्यो दिवपाची गरज आसा, अशें एका तरणाट्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
