भांगरभूंय | प्रतिनिधी
बांदा, प्रतिनिधी : सिंधुदुर्गच्या रानांत सांखळेन बांदिल्ले अवस्थेंत सांपडिल्ले ते अमेरिकन बायलेन स्वताच झाडाक सांखळेन बांदून घेतिल्लें, अशी म्हायती पुलीस तपासांत मुखार आयली. हे बायलेक स्किझोफ्रेनिया हें मानसीक दुयेंस आशिल्ल्यान तिणें पयलीं पुलिसांक दिल्ली म्हायती फट थारली. मानसीक दुयेंस आशिल्ले हे बायलेन पुलिसांची दिकाभूल करपाक आपल्या घोवाचें नांव घेतिल्लें. तिचेर रत्नागिरीच्या सरकारी हाॅस्पिटलांत उपचार चालू आसात, अशी म्हायती डॉ. संघमित्रा गावडे-फुले हांणी दिली.
सोनुर्लीच्या रानांत ती बायल सांखळेन बांदिल्ले अवस्थेंत सांपडले उपरांत पुलिसांनी चवकशी करपाक सुरवात केली. तिचें नांव ललिता काई कुमार एसके आशिल्ल्याचें समजलें. चवकशी केली तेन्ना तिणें घोवान रानांत हाडून झाडाक आपल्याक बांदून थंयच्यान पळ काडलो, अशी म्हायती पुलिसांक दिल्ली. तो तामिळनाडू रावता अशेंय तिणें सांगिल्लें. उपरांत बांदा पुलिसांनी घोवा आड गुन्यांव दाखल केल्लो. ह्या प्रकरणाची दखल अमेरिकी दुतावासान घेतल्या उपरांत पुलिसांचो तपास आनीक खर जालो. तिच्या घोवाक सोदून काडपा खातीर पुलीस पंगड तमिळनाडू गेले. मात तिणें दिल्लो पत्तोय बनावट आसलो. ताका लागून पुलिसांक ते बायलेचेरूच दुबाव आयलो. तिचो मोबायल, इलेक्ट्रॉनीक वस्तूंची तपासणी केली तेन्ना मुंबय ते गोंय तिणें एकटेनूच प्रवास केल्ल्याचें मुखार आयलें. ते बायलेन मुंबय लागसारा विरार वाठारंतल्यान तंबू विकत घेतिल्लो. तिचे कडेन ३१ हजार रुपयाय सांपडले. ती रानांत सांपडली तेन्ना तिचे कडेन खावपाचे जिन्नसूय आशिल्ले.
https://www.facebook.com/bhaangarbhui/videos/467217642777464/
ते बायलेचेर रत्नागिरींत उपचार चालू आशिल्ले. तिची भलायकी सुदारले उपरांत तिणें थंयचे वैजकी अधिकार्याक सांखळेन बांदून दवरिल्ले घडणुके विशीं सत सांगलें. ताका लागून आतां चित्र स्पश्ट जालां. तिणें सांगलें, आपूण स्वताच आत्महत्या करपा खातीर मंडुरा स्टेशनाचेर देंवून त्या रानांत गेल्लीं. आपलो व्हिसा सोंपिल्लो. तशेंच सोयर्यांनी पयशे धाडप बंद केल्ले. ताका लागून ह्यो सगळ्यो गजाली घडोवन हाडिल्ल्याचें तिणें वैजकी अधिकार्याक सांगलें. उपरांत ही सगळी म्हायती वैजकी अधिकार्यान पुलिसांक दिली.
स्किझोफ्रेनिया म्हळ्यार कितें?
स्किझोफ्रेनिया आशिल्ल्या मनशाची मती भ्रमांत आसता. तो एका काल्पनीक संवसारांत जगता. जातूंत ताका वेगवेगळीं चित्रां दिसपाक लागतात. विवीध तरेचे आवाज आयकुपाक येतात. हें दुयेंस आशिल्ली व्यक्ती आपल्या भोंवतच्या लोकांचेर खूब दुबाव घेता. दरेकलो आपले आड कट रचता अशें ताका दिसता. स्किझोफ्रेनिया आशिल्ल्या मनशाक लक्षणांच्या स्वरूपांत जायत्यो समस्या दिसपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
