भांगरभूंय | प्रतिनिधी
जनार्दन भंडारीः आगोंदाचें उदक पिवपाक योग्य नाशिल्ल्याचो अहवाल
भांगरभूंय । प्रतिनिधी
काणकोणः काणकोणां किडनीचे दुयेंती वाडपाचें मुख्य कारण म्हणल्यार दुशीत उदक. आतां काणकोण आगोंदा उदका पुरवण विभाग पुरवण करता तें उदक दुशीत आसा, हाचो अहवाल आयला. ताका लागून आतां ती ह्या सरकारी अधिकाऱ्यांचेर कारवाय करची ना जाल्यार आपूण न्यायालयांत दाद मागतलों, अशें काँग्रेस पक्षाचे फुडारी जनार्दन भंडारी हांणी काणकोणां घेतिल्ले पत्रकार परिशदेंत सांगलें. ह्या वेळार तांच्या वांगडा वैशाल पागी आनी सौरभ गायक हाजीर आशिल्ले.
भौशीक बांदकाम खात्याचो उदक पुरवण विभाग पुरवण करता तें आगोंद पंचायतींतल्या पारवें, मुडकड, शेळपें, माटवेमळचें उदक पियेवपाक योग्य नाशिल्ल्यो अहवाल भलायकी खात्याच्या पर्यावरण आनी प्रदुशण नियंत्रण मंडळा कडल्यान आयला. ह्या वाठारांतलें उदक पियेवपाक योग्य नाशिल्ल्याचो अहवाल येवन 20 दिसां परस अदीक दीस जाल्यात, तरी लेगीत संबंदीत यंत्रणेन पारवे, मुडकूड, शेळपेच्या उदका पुरवणेंत सुदारणा करूंक ना. काणकोणच्या लोकांच्या जिवा कडेन उदका पुरवण विभाग खेळटा. हे आदीं उदका पुरवण विभागाचे कनिश्ठ अभियंते, सहाय्यक अभियंते आनी सुपरवाझरा आड काणकोण पुलीस स्टेशनार कागाळ दाखल केल्ली. ह्या अधिकाऱ्यांच्या घाळपणाक लागून काणकोणकारांची भलायकी इबाडटास अशें भंडारी हांणी सांगलें. आगोंद पंचायत वाठारांत पुरवण करता तें उदक दुशीत आशिल्ल्याचो अहवाल आयिल्ल्याची म्हायती मेळ्ळी, पूण आपल्या हातांत अहवाल नाशिल्लो. म्हायती हक्क कायद्या वरवीं आपणे अहवालाची प्रत मेळयली. काणकोणचे पुलीस भौशीक बांदकाम खात्याच्या अधिकाऱ्यांक सांबाळून घेवचे कातीर तांचे आड एफआयआर दाखल करपाक फाटीं सरतात, असो आरोप भंडारी हांणी केलो. काणकोणांतल्या दुशीत उदका संबंदांत आपूण आपल्या पक्षाच्या आमदारा वरवीं हो प्रस्न विधानसभा अधिवेशनांत उपस्थीत करपाक सांगतलों, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
