भांगरभूंय | प्रतिनिधी
दिव्यांग सक्षमीकरण मंत्री डॉ. प्रमोद सावंत हांची लेखी म्हायती
भांगरभूंय । प्रतिनिधी
पणजीः पर्पल फेस्ट 2023 आनी 2024 ह्या दोनूय इव्हेटां खातीर 27.35 कोटी रुपया खर्च आयला. पर्पल फेस्ट 2023 गोंय सरकारान आपल्या खर्चांतल्यान मनयल्लो. ताका 6 कोटी परस चड खर्च आयिल्लो. पर्पल फेस्ट 2024 क केंद्रांतल्यान निधी आयिल्लो आनी हे खातीर 20 कोटी परस चड खर्च जालो, अशी म्हायती दिव्यांग सक्षमीकरण मंत्री डॉ. प्रमोद सावंत हांणी लेखी जापेंत दिल्या.
पर्पल फेस्ट 2023 आनी 2024 ह्या दोन इव्हेंटां खातीरच्या खर्चाचे तपशील विरोधी पक्ष फुडारी युरी आलेमांव हांणी मागिल्ले. दिव्यांग सक्षमीकरण मंत्र्यान विधानसभेच्या पटलार सगळे तपशील दवरल्यात.
जानेवारी 6 ते 8, 2023 गोंय मनरीजवण संस्थेंत पर्पल फेस्ट मनोवपा खातीर राज्य सरकारान समाज कल्याण खात्यांक 5,07,27,757 रुपया दिल्ले तशेंच सुविधा उबारपांखातीर इव्हेंट मॅनेजमेंट कंपनींक फारीक केले. ते भायर राज्य सरकारान पर्पल फेस्टा खातीर 1,50,00,000 रुपया राज्य दिव्यांग आयुक्त कार्यालयाक दिल्ले. सुरक्षा, सन्मानचिन्न, आयटी सेवा, जेवण आनी खाण, थळाचें भाडें, रावपाची वेवस्था, प्रिटींग आनी स्टेशनरी, वेवसायीक शुल्क, मार्केटींग आनी मिडिया प्रचार, येरादारी आनी प्रवास, मनीसबळ आनी हेर खर्चाचेर 1.84 कोटी रुपया मोडले. 8 ते 13 जानेवारी 2024 ह्या काळांत राज्य सरकारान समाज कल्याण खात्याक 15,78,27,360 रुपया दिल्ले. ते इव्हेंट मॅनेजमेंट कंपनींक फारीक केले. ते भायर केंद्राच्या राष्ट्रीय निधी येवजणे खाला पर्पल फेस्ट मनोवपा खातीर गोंय राज्य दिव्यांग आयुक्त कार्यालयाक 5,00,00,000 रुपया आयिल्ले. रावपाची वेवस्था, इव्हेंट/ कार्यशाळा खर्च, जेवण, आयटी सेवा, थळावी येरादारी, मनीसबळ, मार्केटींग आनी प्रचार, सादरीकरण शुल्क, पर्पल फेस्ट सल्लागार, भाड्याचो खर्च, सप्लायर टीडीएस, येरादारी खर्च आनी प्रवास खर्चाचेर 5 कोटी परस चड पयशे मोडले, अशी म्हायती जापेंत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
