भांगरभूंय | प्रतिनिधी
ढाका, खबरां संस्था: बांगलादेशांतल्या आरक्षणा आडचें आंदोलन सोमारा आनीक खर जालें. हजारांनी आंदोलक प्रधानमंत्री शेख हसीना हांच्या घरांत घुसल्यात. मजगतीं, प्रधानमंत्री शेख हसिना हांणी प्रधानमंत्री पदाचो राजिनामो दिला. ती सरकारी बंगलो सोडून सुरक्षीत थळाचेर गेल्यात. कांय जाणांच्या मतान तांणी भयण रेहाना सयत देश सोडून भारतांत आश्रय घेतला.
निदर्शक आनी पुलिसां मदीं जायत्या सुवातींनी झगडीं पेटल्यांत. हातूंत ६ परस चड जाणांक मरण आयलां. तांगेल आनी ढाकाचे म्हत्वाचे म्हामार्ग निदर्शकांनी आडायल्यात. हसीना हांच्या सरकारा आड सुमार ४ लाख लोक रस्त्यार देंवल्यात.
पीटीआयच्या म्हणण्या प्रमाण, आयतारा ९७ जाणांक मरण आयलें. हाचे वांगडाच ५०० परस चड लोक जखमी जाले. हिंसाचाराचेर नियंत्रण दवरपा खातीर सरकारान देशभर कर्फ्यू लायला. इंटरनेटूय बंद केला. फुडल्या ३ दिसां खातीर सुटीय जाहीर केल्या.
आरक्षणा वयल्यान हिंसाचार
१९७१ त बांगलादेश पाकिस्ताना कडल्यान स्वतंत्र जालो आनी त्याच वर्सा ८० टक्के आरक्षण कोटा पद्दत सुरू जाली. उपरांत तातूंत जायते फावट बदल जालो. हातूंत निमाणो बदल २०१२ वर्सा जालो, तेन्ना राखीव कोटा ५६% आशिल्लो. हातूंत ३० टक्के नोकर्यो बांगला देश मुक्त करपाक वावुरिल्ल्या स्वातंत्र्य झुजार्यांच्या भुरग्यांक, १० टक्के मागास जिल्ह्यांक, १० टक्के बायलांक, ५ टक्के अल्पसंख्यांकांक आनी १ टक्के दिव्यांग आशिल्ल्यांक नोकर्यो दवरिल्ल्यो.
२०१८ वर्सा ४ म्हयन्यांच्या विद्यार्थ्यांच्या आंदोलना उपरांत हसीना सरकारान कोटा पद्दत काडून उडयल्ली, पूण फाटल्या म्हयन्यांत ५ जून दिसा उच्च न्यायालयान सरकाराक परतून आरक्षण लागू करपाचो आदेश दिलो. २०१८ वर्सा पयलीं जशी आरक्षणाची अंमलबजावणी जाल्ली तेच पद्दतीन परतून चालीक लावपाक जाय अशें न्यायालयान सांगलें. ताचे उपरांत निशेध सुरू जाले.
बांगलादेशच्या सर्वोच्च न्यायालयान सरकारी नोकर्यांत ५६ टक्के आरक्षण दिवपाचो ढाका उच्च न्यायालयाचो निर्णय रद्द केलो.
आरक्षण ५६% वेल्यान ७% वयर हाडलें. हातुंतले ५% कोटा सुटके झुजार्यांच्या कुटुंबांक (पयलीं हो ३० टक्के आसलो.) आनी २% कोटा जातीय अल्पसंख्याक, ट्रान्सजेंडर आनी दिव्यांगांक दिला. गुणवत्तेच्या आधारान ९३ टक्के नोकर्यो दितले, अशें सर्वोच्च न्यायालयान म्हणलां.
सर्वोच्च न्यायालयाच्या निर्णया उपरांतूय विद्यार्थ्यांची तिडक उणी जावंक ना. तांणी शेख हसीना हांकां पद सोडपाची मागणी सुरू केली. हाचे फाटलें कारण म्हणल्यार आंदोलनाच्या सात मुखेल फुडाऱ्यांक बंदखणींत उडयिल्ले. तांकां सोडचे, तशेंच हसिना हांणी राजिनामो दिवचो, हे खातीर फाटल्या कांय दिसां सावन आंदोलन खर जाल्लें. हें आंदोलन सुरवेक विद्यार्थ्यांनी सुरू केल्लें. उपरांत सगलेच तातूंत वांटेकार जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
