पेडणेंच्या विवीध गांवांतल्यान वट्ट ३९ हेक्टर भात शेतीचो इबाड
भांगरभूंय | प्रतिनिधी
पेडणें, प्रतिनिधी: पेडणेंच्यो वट्ट २० ग्रामपंचायती आनी एका पेडणें नगरपालिका वाठारांतल्या जायत्या भाताच्या शेतांनी घोग्यांनी पडपी पावसाचें उदक वचपाचो मार्ग बंद जाल्ल्यान रोयिल्लीं शेतां कुसून गेल्यांत. ताका लागून परत शेतांची लागवड करप कठीण जाल्या. आतां हीं शेतां पडंग उरतलीं. सरकारान आनी कृषी खात्यान हाचे कडेन लक्ष दिवन शेतकारांक लुकसाण भरपाय दिवची, अशी मागणी शेतकारांनी केल्या.
पेडणें म्हालांतल्या वट्ट ३९ हेक्टर भात शेतीचें अंदूं लुकसाण जालां. तशेंच जायत्या बागायतींतल्या झाडांचोय इबाड ह्या पावसांत जाला. रानवटी जनावरांचेरूय शेतकी खात्यान आजूनय कितेंय उपाय काडूंक ना. फाटल्या पंदरा वर्सां सावन चांदेल, हंसापूर, हळर्ण, खुटवळ ह्या वाठारांनी व्हडा प्रमाणांत गवे येवन शेतांची वाट लायतात. सरकारान हाचे कडेन लक्ष दिवन कितेंय उपाय करचे आनी शेतकी वेवसायाक प्राधान्य दिवचें, अशी मागणी शेतकरी रमेश शेट्ये हांणी केल्या.
आगरवाडो पंचायत वाठारांतल्या वट्ट ४० शेतकरांच्या शेतांक व्हडा प्रमाणांत लुकसाण जालां. हांगा उदक भरिल्ल्यान पेरणी केल्ल्या शेताचो इबाड जाला. हाचेरूय कृषी खात्यान लक्ष दिवन हाचेर उपाय काडचे अशी मागणी शेतकरी अमोल राऊत हांणी केली.
मांद्रें दांडोस वाडो, देऊळवाड्यारूय शेतांचें लुकसाण जाला. हालींच ह्या वाठाराचे आमदार जीत आरोलकार हांणी शेतकारांची भेट घेवन शेतांची पळोवणी केली. पंदरा दिसां भितर लुकसाण भरपाय सरकारा कडल्यान मेळोवन दिवपाची गवाय तांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
