भांगरभूंय | प्रतिनिधी
परराश्ट्र मंत्रालयाची राज्यसभेंत म्हायती
नवी दिल्ली, खबरां संस्था ः नागरीकत्व सोडपी भारतीयांचो आंकडो वाडत आसा. तांतूतले चडशे भारतीय आपलें नागरीकत्व सोडून अमेरिकेंत वचपाक लागल्यात. 2019 वर्सा 1,44,017 भारतीयांनी नागरीकत्व सोडलें. 2020 वर्सा 85,256, 2021 वर्सा 1,63,370 आनी 2022 वर्सा 2,25,620 जाणांनी नागरीकत्व सोडपाचो निर्णय घेतलो. फाटल्या वर्सा 2023 वर्सा 2 लाख 16 हजार लोकांनी भारतीय नागरीकत्व सोडलें.
पंजाबाचे खासदार राघव चढ्ढा हांणी राज्यसभेंत हे विशीं प्रस्न विचारिल्लो. ताचेर जाप दितना परराश्ट्र मंत्रालयान ही म्हायती दिली.
चडशे भारतीय अमेरिकेंत वतात
चडशे भारतीय आपलें नागरीकत्व सोडून अमेरिकेंत वचपाक लागल्यात. 2018 ते 2023 मेरेन भारतांतल्यान 3,28,619 भारतीयांनी अमेरिकेचें नागरीकत्व मेळयलें. जाल्यार 1,61,917 लोकांनी कॅनडाचें नागरीकत्व घेतलां आनी 1,31,883 लोकांनी ऑस्ट्रेलियन नागरीकत्व घेतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
