भांगरभूंय | प्रतिनिधी
भुवनेश्वर, खबरां संस्था ः ओडिशाच्या भुवनेश्वरांत 34 वर्सां पिरायेच्या तरणाट्यान आपूण पुलीस अधिकारी आशिल्ल्याचे सांगून पांच बायलां कडेन लग्न केलें. तशेंच तांचे कडल्यान लाखांनी रुपया वसूल केले. विशेश म्हळ्यार पुलिसांच्या चवकशे उपरांत कळ्ळें की आरोपीन मॅट्रिमोनियल सायटी वरवीं हेर 49 बायलां कडेन लग्नाची उलोवणी केल्यांत.
आरोपीचें नांव सत्यजीत समल आसा. सत्यजीता कडेन लग्न जाल्ल्या पांच बायलां मदल्या दोन बायलां कडल्यान कागाळीं आयले उपरांत पुलिसांनी बायलां पुलीस अधिकाऱ्यांक घेवन सत्यजीता खातीर सापळो रचलो. भुवनेश्वर-कटक पुलीस आयुक्त संजीब पांडा हांणी सांगलें, बायल अधिकाऱ्याची प्रोफायल तयार केली. आनी ताचे कडेन सत्यजीत लग्नाची उलोवणी करपाक आयलो तेन्ना ताका धरलो.
आरोपी गुन्यांव कसो करतालो?
आरोपी सत्यजीत हो ओडिशाच्या जाजपूर जिल्ह्यांतलो. पूण सद्या तो भुवनेश्वरांत रावता. मॅट्रिमोनियल सायटी वरवीं तो विधवा आनी घटस्फोट जाल्ल्या बायलांक लक्ष्य करतालो. लग्न जुळ्ळें उपरांत तो चलयेच्या घरच्यां कडल्यान गाडी आनी रोख पयशे मागतालो. लग्न जाले उपरांत परतून पयशे मागून दिवंक ना जाल्यार तांकां पिस्तूल दाखोवन धमकायतालो.
फेब्रुवारींत एके बायलेन मुखार येवन कागाळ केल्ल्यान ह्या प्रकरणाची चवकशी सुरू जाली. मॅट्रिमोनियल सायटी वरवीं सत्यजीताची ह्या बायलेकडेन वळख जाली. लग्नाचें उतर दिवन आरोपीन तिचे कडेन जबरदस्तीन शारिरीक संबंद दवरले. ते उपरांत तो पयशे आनी गाडी मागपाक लागलो. हे बायलेन वैयक्तीक रीण घेवन 8.15 लाख रुपयाची गाडी घेवन दिली. तशेंच आरोपीच्या मागणे प्रमाण वेवसाय सुरू करपा खातीर 36 लाख रुपया दिले.
दुसरे कागाळी प्रमाण दुसरे बायलेन सत्यजीताक 8.60 लाख रुपया दिले. तशेंच दुचाकी घेवन दिली. हे बायलेनय वेगवेगळ्या बँकां कडल्यान वैयक्तीक रीण घेवन आरोपी सत्यजीत हांची मागणी पुराय केली.
सत्यजीत हांकां विलासी जिवीत जगपाची सवय आशिल्ली अशें पुलीस आयुक्त पांडा हांणी सांगलें. बायलांकडल्यान पयशे वसूल करून तो दुबय पळून वतालो आनी दुसरी बायल मेळ्ळी की परत येतालो.
आरोपी सत्यजीत हाका पुलिसांनी अटक करुन ताचे कडल्यान मोटारसायकल, 2.10 लाख रुपया रोख रक्कम, पिस्तूल, काडतुसा आनी लग्न संबंदीत कांय कागदपत्रां जप्त केल्यात. चवकशे वेळार सत्यजीतान कागाळ केल्ल्या दोगांय बायलां कडेन आपूण लग्न केल्ल्याचें मान्य केलें. तशेंच सत्यजीत हांची तीन बँक खातीं पुलिसांनी गोठयल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
