भांगरभूंय | प्रतिनिधी
पेडणें, प्रतिनिधी: पेडणें म्हालांतल्या हळर्णच्या उपसरपंच पदार प्रभाग नं. ६ ची पंचायत वांगडी आरती नारायण राऊळ हांची विरोधा विणें निवड जाली. सरपंच महेश्वर परब हांचे अध्यक्षते खाला ही निवड जाली. ह्या वेळार तिका सरपंच, पंच वांगडी आनी ग्रामस्थांनी परबीं भेटयलीं.
सिद्धी राऊळ हांणी उपसरपंच पदाचो राजिनामो दिलो. त्या दिवसापासून उपसरपंच पद रितें आशिल्लें. ह्या रित्या पदा खातीर सरपंच महेश्वर परब हांचे अध्यक्षते खाला पंचायत कार्यालयांत हालींच जाल्लें बसकेंत आरती राऊळ हांची विरोधा विणें निवड जाली.
हे बसकेक सरपंच महेश्वर परब, आदली उपसरपंच सिद्धी राऊळ, आतांची उपसरपंच आरती राऊळ, पंच वांगडी शैलेश नायक, रामचंद्र परब, दिव्या नायक आनी विनोद हरिजन हाजीर आशिल्लीं.
वेंचणूक निरिक्षक म्हणून पेडणेंचे गटविकास कार्यालयांतले अधिकारी भिवा ठाकूर हाजीर आशिल्ले. तांकां पंचायत सचीव अमोल सावंत आनी कारकून अर्जुन सावंत हांणी सहकार्य केलें. आरती राऊळ हांची उपसरपंचपदार विरोधा विशें निवड जाल्ले खातीर सरपंच महेश्वर परब हांच्या नेतृत्वा खाला पंचायत मंडळान परबीं भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
