भांगरभूंय | प्रतिनिधी
शाहपूर, खबरां संस्था: मध्य प्रदेशांतल्या सागर जिल्ह्यांतल्या शाहपूर गांवांत धर्मीक कार्यावळी वेळार वणट कोसळून ९ भुरग्यांक मरण आयिल्ल्याची घडणूक घडल्या. चार भुरगीं गंभीर जखमी जाल्यांत. तांची स्थिती गंभीर आसा अशें समजता. फाल्यां सावन श्रावण म्हयनो सुरू जाता, तें खातीर शाहपूर गांवांतल्या हरदयाल देवळांत शिवलिंग तयार करतना हो अपघात जालो.
सागर जिल्ह्याचे जिल्होधिकारी दीपक आर्य हांणी सांगलें, व्हड पावसाक लागून मोडपाक पाविल्ल्ल्या घराची वणट कोसळ्ळी. ही वणट ५० वर्सां पोरणी अशें तांणी सांगलें.
आयज आयतार आशिल्ल्यान शाळेक सुटी आशिल्ली. ताका लागून हांगा जायतीं भुरगीं शिवलिंग तयार करपाक जमिल्लीं. त्याच वेळार वणट कोसळ्ळी. वणटीचे मातयेच्या रांशी पोंदाक चिड्डल्ल्या भुरग्यांक भायर काडपा खातीर बुलडोझर हाडचे पडले.
ही वणट कोसळ्ळी तेन्ना देवळा कुशीक आशिल्ल्या माटवांत हीं भुरगीं बशिल्लीं अशें दीपक आर्य हांणी सांगलें. फाटल्या कांय दिसां सावन पडिल्ल्या पावसाक लागून ही वणट मोडपाक पाविल्ली. आयज सकाळीं सुमार साडे आठ वरांचे हो अपघात घडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
