भांगरभूंय | प्रतिनिधी
वायनाड, खबरां संस्था: केरळांतल्या वायनाड जिल्ह्यांतल्या कांय गांवांनी ३० जुलयाक पालसणां कोसळ्ळीं. हाचो तीन ते चार गांवांचेर परिणाम जालो. आतां मेरेन ह्या अपघातांत २१९ जाणांक मरण आयिल्ल्याचें उक्तें जालां. शेंकड्यांनी नागरीक अजूनय बेपत्ता आसात. यंत्रणे कडल्यान मजत कार्य सुरू आसतनाच, हे घडणुके उपरांत शेंकड्यांनी लोकांक तांच्या घरांतल्यान भायर काडून सुरक्षीत सुवातेर व्हेले. चार दिसांनी हे लोक आपल्या घरा परतले तेन्ना तांकां धक्को बसलो. कितल्याशाच लोकांच्या घरांनी चोरी जाल्ल्याचें मुखार आयलें. पयलींच हे घडणुकेक लागून लागींच्या मनशांक होगडायिल्ल्या लोकांक आतां हातींतल्यान सगळेंच गेल्ले वरीं दिसता.
पालसणां कोसळ्ळ्या उपरांत बचाव पंगडान सुरक्षिततायेच्या कारणांक लागून थंयच्या लोकांक तांच्या घरांतल्यान भायर काडून आश्रय केंद्रांत व्हेल्ले. चार दिसांनी नागरीक घरा परतले तेन्ना तांकां तांची मोलादीक वस्तू ना जाल्ल्याचें दिसून आयलें. आतां जायत्या थळाव्या लोकांनी पुलिसां कडेन कागाळ केल्या. रातच्या वेळार पुलीस गस्त वाडोवपाचीय मागणी नागरिकांनी केल्या. केरळांतल्या सगळ्यांत व्हडल्या सैमीक संकश्टाच्या काळांत चोरांनी हात साफ केल्ल्याचें ह्या प्रसंगाचेर दिसून आयलां.
सगळें होगडायिल्ल्या नागरिकांनी चोरांचेर खर कारवाय करपाची मागणी केल्या. रातच्या वेळार वाठारांत भितर सरपी अनोळखी मनशांचेर नदर दवरपाची मागणीय केल्या. लोकांनीय पत्रकारां कडेन उलयतना आपलें दुख्ख उक्तायलें.
नागरीकांच्या कागाळींची दखल पुलिसांनी घेतल्या आनी रातच्या वेळार वाठारांत गस्त वाडोवपाचें उतर दिलां. तशेंच चोरांक धरून तांचेर खर कारवाय करतले अशें पुलिसांनी सांगलें.
वाटावपाचें काम चालूच
मजगतीं, शेनवारा लेगीत पालसणां कोसळून परिणाम जाल्ल्या वाठारांत बचाव कार्य चालूच आशिल्लें. चिखलांत अडकल्ल्यांचो सोद आधुनीक रडार, ड्रोन वापरून करतात. थळावे लोक अजूनय कांय जाण बेपत्ता आसात अशी म्हायती दितात. हे फाटभूंयेर सोद ऑपरेशन चालू आसा. राज्य सरकारान पुनर्वसन येवजण जाहीर केल्या आनी पिडेस्तां खातीर नवीं घरां बांदून दिवपाचें जाहीर केलां.
भूंयकांप जाल्ल्या सुवातेर वेगवेगळ्या प्रणालींचे १३०० कर्मचारी काम करतात. हांगा एनडीआरएफ, के-९ डॉग स्कॉड, लष्कर, विशेश तपास पंगड, मद्रास इंजिनिअरिंग ग्रुप, पुलीस, उजो पालोवपी विभाग, वन विभाग, नौदळ आनी दर्या सुरक्षा दळाचे जवान तैनात केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
