भांगरभूंय | प्रतिनिधी
कांय वर्सां आदीं आदले मुख्यमंत्री रवी नायक हांणी गोंयांत तिसऱ्या जिल्ल्याची गरज आसा अशें म्हणत, तशी मागणी करपाक सुरवात केल्ली. 29 जानेवारी 2012 त तांणी विधानसभेंत हे विशींचो खाशेलो थाराव मांडलो. उपरांत नोव्हेंबर 2023 वर्सा राज्य सरकारान हाचो अभ्यास करपा खातीर मुखेल सचिवांच्या फुडापरणा खाला एक समितीय काडली. हाचो अर्थ सरकारान हो विशय बरोच मनार घेतला हें कळटा.
आतां परत सांवड्डेचे आमदार डॉ. गणेश गांवकार हांणी हो विशय विधानसभेंत मांडलो. तेन्ना तांकां सरकारा कडल्यान सकारात्मक जाप मेळ्ळी. फकत वाद आसा तो ह्या जिल्ल्यांत खंयचे- खंयचे मतदारसंघ घालपाचे ताचेर. नवो जिल्लो तयार करपाचेर सक्रियपणान विचार चल्ला अशें महसूल मंत्री बाबुश मोंसेरात हांणीय सांगलां.
गणेश गांवकार हांच्या मता प्रमाण सांवड्डें, फोंडें, सांखळे, वाळपय, प्रियोळ, शिरोडें आनी मडकय हे मतदारसंघ तिसऱ्या जिल्ल्यांत आस्पावीत करपाक जाय आनी जिल्ल्याचें मुखेल कार्यालय फोंड्यां आसचें अशी तांणी इत्सा उक्तायल्या. मात, सभापती रमेश तवडकार, काँग्रेसचे आमदार अॅल्टन डिाकॅस्ता हांकां हें कार्यालय केप्यां जाय. तशेंच ते वटेचे मतदारसंघ ह्या तिसऱ्या जिल्ल्यांत आस्पावीत केल्ले जाय.
सभापती तवडकार हांच्या मता प्रमाण काणकोण, केपें आनी सांवर्ड्डें मतदारसंघ उदरगतीचे नदरेन मात्शे फांटी उरल्यात, ते खातीर तांकां उर्बा दिवपाक ह्या मतदारसंघाचो आस्पाव तिसऱ्या जिल्ल्यांत करप गरजेचें. काणकोण, केपें आनी सांवर्ड्डें मतदारसंघांत अनुसुची जमातीचे लोक चड प्रमाणांत आशिल्ल्यान तांकां मुखार काडपाक आनी तांकां बरी सेवा दिवपाक तिसऱ्या जिल्ल्याचो उपेग जातलो. तिसऱ्या जिल्ल्यांत खंयचे मतदारसंघ घालप हें समितीच्या अभ्यासा उपरांत थारतलें. विचारांत घेतिल्ल्या मतदारसंघाची अर्थीक स्थिती, लोकसंख्या, थंय आशिल्ल्यो साधन सुविधा आनी लोकांचीं मतां घेवनूच अखेरचो निर्णय घेतले. फकत हांगां राजकारण्यांचो सुवार्थ जागो जालो आनी तांणी आपल्याक बऱ्याक पडटा तशें केलें जाल्यार हे समितीच्या अभ्यासाक कांयच अर्थ उरचो ना.
अमूक मतदारसंघांत आमच्या पक्षाचे मतदार चड आसात आनी ते खातीर तिसरो खासदार निवडपाक आमकां सोंपें जातलें अशें गणीत जर तांचे तकलेंत भरलें, जाल्यार हे समितीच्या वावराक आनी लोकांच्या ‘मतां’क कांयच वालोर उरचो ना. हय! ह्या तिसऱ्या जिल्ल्याक लागून गोंयाक आनीक एक लोकसभा खासदार मेळटलो. राजकीय नदरेन गोंयचें म्हत्व मात्शें उबारून येतलें. राजकी फुडाऱ्यांक ह्या जिल्ल्याचो खासदार जावपाचीं सपनां पडटलीं आनी रोखडेंच नवें राजकारण सुरू जातलें, हातूंत दुबाव ना. फकत शिमो थारायतना घरांतल्या वांगड्यांक विभाजीत करचे न्हय इतली अपेक्षा. विधानसभा मतदारसंघाच्यो शिमो तयार करतना एकाच घरांतल्या वांगड्यांक विभाजीत करून दोन वेगवेगळ्या मतदारसंघांनी प्रकार हे आदीं घडल्यात. म्हणल्यार आवय- बापूय फोंड्यां मतदारसंघांत जाल्यार भुरगीं प्रियोळ मतदारसंघांत, अशे प्रकार घडल्यात.
तिसरो जिल्लो जालो जाल्यार लोकांक ताचो लाव जातलोच. काणकोण सारक्या मतदारंघांत रावपी लोकांक कसल्याय सरकारी कामाक मडगांवां येवचें पडटा, तें इतलें पयस येवंक पडचेंना. केप्यां कार्यालय जालें जाल्यार तांकां लागीं जातलें. तशेंच नव्या जिल्ल्याक ज्यो साधनसुविधा जाय त्यो सरकाराक तयार करच्यो पडटल्यो. हातूंतल्यान गोंयचो खरे तरेन विकास जावंक मदत जातली. पूण हें सगळें खरेपणांत हाडूंक सरकारान यत्न करचे पडटले. समितीचे फांटी लागून ते विशींचो अहवाल घेवंचो पडटलो आनी फुडल्या कामाक लागचें पडटलें. नाजाल्यार ही फायल खंय शेणत हें सांगूंक शकना.
कायद्या प्रमाणें हे प्रकियेंत लोकांक आसपावन घेवप गरजेचें. ‘डेव्हलॉपमॅन्ट वीथ कन्सेन्ट’ हो गोवा फॉरवर्ड पक्षाचो जसो मंत्र आसा, तसो सरकारानूय चालीक लावन लोकांचे विचार आयकून घेवचे पडटले. आपल्या फायद्याक पडटा अशें केलें जाल्यार लोकांक ताचो कांयच फायदो जावचो ना. राजकी पक्षांनी हो जिल्लो आपल्याक जाय तसो थारावचो न्हय म्हूण लोकांनी तांचेर नदर दवरची पडटली आनी जनते आड गेल्यार आवाज काडचो पडटलो. जाल्यारूच ह्या तिसऱ्या जिल्ल्याची खरी मोख साद्य जातली…
समीर नायक
मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
