भांगरभूंय | प्रतिनिधी
वित्त मंत्र्यांची विधानसभेंत लेखी जाप
भांगरभूंय । प्रतिनिधी
पणजीः अर्थीक उदरगत म्हामंडळ (ईडीसी) हांणी दिल्ल्या रिणाचे सुमार 50 कोटी थकबाकी आसा. ईडीसीन 42 जाणांक आतां मेरेन 42 जाणांक 68.47 कोटी रुपया रीण दिल्लें. 42 जाणांचीं रीण खातीं ईडीसीच्या हिशोबांतल्यान आतां काडून उडयल्यात, पूण थकबाकी आशिल्ल्या रिणांची भरपाय चालू आसा, अशी म्हायती वित्त मंत्री डॉ. प्रमोद सावंत हांणी विधानसभेच्या लेखी जापेंत दिल्या.
सुरवेक ते आतां मेरेन ईडीसीन कितल्या जाणांक कितलें रीण दिलां आनी तातूंतल्या कितल्या जाणांनी रीण फारीक केलां, असो प्रश्न हळदोणेंचे आमदार कार्लोस फेरेरा हांणी विधानसभेंत विचारिल्लो.
विधानसभेच्या पटलार वित्त मंत्र्यान 1990 पयली ते 30 जून 2024 मेरेनचे तपशील दिल्यात. ईडीसींतल्या हिशोब पुस्तकांतल्यान डिलीट केल्ल्या 42 लाभार्थ्यांनी 68,47,25,582 रुपयांचें रीण घेतिल्ले. तातूंत राजकारणी आनी उद्देजकांचो आस्पाव आसा. ह्या रिणांचें खातें ईडीसीन बंद केलां, पूण ह्या 42 मदल्या कांय जाणांनी 49,82,74,715 रुपयांचें रीण बुडयलां. हे रीण माफ करूंक ना, अशें ईडीसीन सांगलां. 42 जाणां मदल्या 12 जाणांनी आपलें सगळें रीण फारीक केलां. हे रीण बुडोवपा मदीं आदले पर्यटन मंत्री मिकी पाशेको हांचें नांव आसा. मिकी हांचे जियोव्हानी आनी झीब्रोनी शिपींग प्रा. लि. हांकां 30 ऑक्टोबर 2008 ह्या दिसा ईडीसीन 4 कोटी रुपयांचें रीण दिल्लें. पूण 2.76 कोटी रुपया मिकी हांणी दिवपाचे उरल्यात. जाल्यार आदले खेळा मंत्री फ्रान्सिको मोन्त क्रुझ हांचे इम्पाला डिस्टीलरी आनी ब्रिव्हरी हाका 23 ऑगस्ट 1993 ह्या दिसा ईडीसीन 4.63 कोटी रुपयांचें रीण दिल्लें. पूण तांणी 4.50 कोटी रुपया फारीक करपाचे उरल्यात. जांचें रीण पारीक करपाचें उरलां तांची मालमत्ता ईडीसीन जप्त केल्या आनी थकबाकी वसूल करपाक वैयक्तीक हमीदारांक उलो मारला.
सरकारी खात्यांनी घेतलां 850 कोटींचें रीण
गोंयच्या विवीध खात्यांनी आनी म्हामंडळांनी 2015 ते 2023 ह्या काळांत ईडीसी कडल्यान 850 कोटी रुपयांचें रीण घेतलां. आतां मेरेन हें खातें आनी म्हामंडळांनी सुमार 456 कोटी रुपया फारीक केल्यात. 2023 त वित्त खात्याच्या कर वेवस्थापन विभागान 350 कोटी रुपयांचें रीण ईडीसी कडल्यान घेतिल्लें. रिणाचे सगळे पयशे खात्यान फारीक केलां. गोंय शिक्षण उदरगत म्हामंडळान जून 2015 त 10 कोटी रुपयांचें रीण घेतिल्लें, तांणी आतां मेरेन 90.08 लाख फारीक केल्यात. गोंय राज्य साधन सुविधा उदरगत म्हामंडळान वर्स 2016 त 300 कोटींचें रीण घेतिल्लें. आतां मेरेन 68.39 कोटी फारीक केल्यात. सिवजरेज आनी सुविधा उदरगत म्हामंडळान वर्स 2017 आनी 2018 त 180 कोटी रीण काडिल्लें. तातूंतले आतां मेरेन 37 कोटी फारीक केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
