भांगरभूंय | प्रतिनिधी
भावंडांनो,
कसवटेर घासून, उज्यांत तापोवन आनी धाडोवन जशी भांगराची परिक्षा घेतात, तशीच विद्या म्हळ्यार शिक्षण, गिन्यान, आनी सद्गुण ह्या गजालींची पारख करूनच मनशाची वळख घेतात. ते गूण मनशा भितर दिसले ना जाल्यार मनशाची जीण निरर्थक थारता. मनीस म्हूण जियेवपाक तो लायक ना अशें मानतात.
भावंडांनो, तुमी हुशार आसप ही बरी गजाल. पूण ती हुशारी तुमचे भितर कशी येता? हय, शिक्षणांतल्यान. शिक्षणांतलो जो सराव तुमी करतात वा वाचन जें करतात तातूंतल्यानच तुमच्यांत हुशारी येता. देखूनच शाळेच्या पुस्तकां वांगडाच त्या संदर्भांतलीं हेर पुस्तकां तुमी वाचप भोव गरजेचें आसा.
भावंडांनो, संवसारांतल्या मोलादीक हिऱ्या माणकां परसूय चड सोबीत आसा तें गिन्यान. तें गिन्यान भोव म्हत्वाचें. हें गिन्यान आमकां खूब सूख, धादोसकाय, पयसो आनी समाजांत भोंवतणी प्रतिश्ठा, मान मेळोवन दिता. संवसारांतल्या गिन्याना कडेन वचपाचें तें मुखेल दार म्हणल्यार म्हाद्वार आसा. म्हळ्यारूच वाचन. पुरातन काळासावन वर्तमान काळांतल्यान संवसारांतल्या व्हड बुदवंतांचे विचार आमकां लाभता. गिन्यान हीच मनशाच्या जिविताची बुनयाद. मनशाक आनीक एक गजाल म्हत्वाची आसा ती म्हणल्यार चारित्र्य. चारित्र्य मनशाची राखण करता आनी हें चारित्र्य, शिक्षण घडयता. शिक्षणांत आमी करतात तें वाचन. हें चारित्र्य घडोवपाक खूब मोलाचें थारता.
वाचन मनशाचे जिणेक धीर दिता. वाचन मनशां मनदीं बुद्दीचो विकास करता. बुद्ध चवकस करता. भावंडांनो, ‘बरें उतर’ हें मनशाचो एक अळंकार. तो अळंकार वाचनांतल्यान जाता. वाचन मनशाक चिंतनशील करता. विचार करपाक उर्बा दिता. थोडे भितर सांगचें जाल्यार वाचन मनशाक पुराय घडयता.
भावंडांनो, वाचनाचें आनी आमचें नातें इतलें लागीचें आसा. तें सांगतना भारतीय घटनेचे, संविधानाचे शिल्पकार डॉ. बाबासाहेब आंबेडकर सांगतात, ‘वाचेल तो वाचेल’.. म्हुणल्यार वाचन करता तो सदांच वाचतलो.
देखुनूच, भावंडांनो दोनूय हात देवी सरस्वती मुखार जोडून आमी तिच्या चरणा कडेन माथें तेंकोवया आनी तिका होरावया.
अपूर्वः कोऽपि कोशोऽयं विद्यते तव भारति।
व्ययतो वृद्धिमायाति क्षयमायाति सञ्चयात्।।
म्हळ्यार हे विद्यादेवी सरस्वती, तुजें हें शब्दरुपी गिन्यानाचें भांडार खूब व्हड, नवलांचें आसा. उरफाटें तें वाडत आसा. ताचें वाचन करपाक तातूंतल्यान समाजाचें फुडारपण करपाक आमकां बरी भलायकी दी. जे मेरेन मळबांत चंद्रीम, सुर्य आसतले ते मेरेन पुस्तकांतलें गिन्यान हें शाश्वत आनी श्रेश्ट उरतलें. देखून आमी सदांच वाचन करीत रावुया.
भावंडांनो, वाचतां, वाचतां आमी गिन्यानी जावया. संस्कारीत जावया आनी हेर भावंडांकय सुसंस्कारीत करपाचो यत्न करुया. करतलीं न्हय सगळीं? शाब्बास! येयात तर.- उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
