भांगरभूंय | प्रतिनिधी
म्हापशें, प्रतिनिधी ः कळंगूटेच्या बोडके वड हांगा पुलिसांनी ड्रग्स प्रकरणांत दुबावीत आरोपी बियाती गांथिरत्न माली (34, मधलेभाट शिवोले आनी मुळ ओडिशा) हाका अटक केली. ताचे कडल्यान 2 लाखांचो 2 किलो 115 ग्राम गांजा जप्त केला.
शुक्रारा 2 तारखेक पुलिसांनी ही कारवाय केली. बोडके वड हांगा ड्रग्स विकपाक एकलो येवपाचो आसा, अशी म्हायती पुलिसांक कांय सूत्रां कडल्यान मेळिल्ली. ते प्रमाण पुलिसांनी सापळो रचिल्लो. दुबावीत गांजो विकपाक आयलो तेन्ना पुलिसांच्या पंगडान ताका धरून झडती घेतली. त्या वेळार दुबाविता कडेन गांजो सांपडलो.
दुबाविताक पुलीस स्टेशनांत हाडलो आनी पुलिसांनी ताचेर गुन्यांव नोंद करून ताका अटक केली.
निरीक्षक परेश नायक हांच्या फुडारपणा खाला उपनिरिक्षक पराग पारेख, हवालदार विद्यानंद आमोणकार, अमीर गरड, भगवान पालयेकर, गणपत तिळोजी, राज परब आनी प्रणय गावस ह्या पंगडान ही कामगिरी केली. पुलीस फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
