भांगरभूंय | प्रतिनिधी
म्हापशें, प्रतिनिधी ः कळंगुटे एका हॉटेलाचे कुडींत जाल्ले चोरये प्रकरणांत पुलिसांनी साईकिरण रेड्डी (24, सुर्यानगर, तेलंगण) हाका केरळांत अटक केली. दुबाविताचेर हैदराबादांत चोरयेचे 31 गुन्यांव नोंद आसात. तांतूतल्या 11 गुन्यांवांनी ताका ख्यास्त जाल्या. पुलिसांनी दुबाविता कडल्यान 4 मोबायल फोन, एक सरपळी, 10 हजार रुपया रोख आनी रुप्याच्यो वस्ती जप्त केल्यात.
31 जुलयाक एका हॉटेलाचे कुडींतल्यान सत्यशील शर्मा (मध्य प्रदेश) ह्या पर्यटकाचो मोबायल फोन आनी रोख पयशे सयत 65 हजारांचो म्हाल चोरलो. दुबावीत चोराचें तोंड हॉटेलाच्या सीसीटीव्हींत कैद जाल्लें. हे फुटेजीचेर आदारून पुलिसांनी चवकशी केली तेन्ना दुबावीत केरळा वटेन गेल्ल्याची म्हायती मेळ्ळी. ते प्रमाण पुलीस पंगड रोखडोच केरळाक वचपाक भायर सरलो आनी किन्नूर रेल्वे स्टेशनाचेर दुबाविताक अटक केली. तेन्ना ताचे कडेन उल्लेख केल्लो म्हाल सांपडलो.
पुलिसांनी ताका गोंयांत हाडून अटक केली आनी चवकशी केली तेन्ना जप्त केल्लो मोबायल फोन आनी रोख रक्कम कळंगूट आनी हेर वस्तू हैदराबादांतल्यान चोरिल्ल्याचे कळ्ळें. उपरांत हें विशींची म्हायती कळंगूट पुलिसांनी हैदराबाद पुलिसांक दिली.
दुबावीत कळंगूटे चोरी करून केरळ मार्गातल्यान हैदराबाद वतालो. हैदराबादांतल्या वेगवेगळ्या पुलीस स्टेशनांनी दुबाविताचेर चोरयेचे 31 गुन्यांव नोंद जाल्यात. तातूंतल्या 11 गुन्यांवानी ताका ख्यास्त जाल्या. उपअधीक्षक विश्वेश कर्पे आनी अधीक्षक अक्षत कौशल हांच्या फुडारपणा खाला पुलीस फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
