वादग्रस्त बाॅक्सिंग मॅच हारिल्ले कॅरिनीक आयबीए दितली 50 हजार डाॅलरांचें इनाम
भांगरभूंय | प्रतिनिधी
न्यूयाॅर्क, खबरां संस्था : पॅरिस ऑलिंपिकांत अल्जेरियाच्या इमान खलिफा आड वेल्टरवेट बाॅक्सिंग मॅचींतल्यान भायर सरले उपरांत आंतरराष्ट्रीय बॉक्सिंग असोसिएशनान (आयबीए) इटलीची आंजेला कॅरिनी हिका 50 हजार डॉलरांचें इनामां दितले अशें जाहीर केलां. फक्त 46 सेकंद चलिल्ले हे मॅचींत खलिफाचे आक्रमक मुठीक लागून कॅरिनी जखमी जाल्ली आनी तिणें मॅच सोडिल्ली. फाटल्या वर्सा आंतरराष्ट्रीय ऑलिंपिक समितीन (आयओसी) आंतरराष्ट्रीय मान्यताय काडून घेतिल्ल्या आयबीएन कॅरिनीच्या फेडरेशनाक आनी प्रशिक्षकाक दरेकी 25 हजार डॉलर मेळटले अशेंय सांगलां. आयबीए आनी आयओसी मदीं बरें ना. ताचो फायदो कॅरिनीक जाला.
बाॅक्सिंग मॅची वेळार जाल्ले घडणुकेक लागून खेळां मळार लिंग पात्रतायेचेर चड व्यापक वाद सुरू जाला. तैवानाची डबल वर्ल्ड चॅम्पियन लिन यू-टिंग आनी इमान खलिफाक आयबीएच्या पात्रताय चांचणे वेळार अपेस आयिल्ल्यान 2023 वर्साच्या संवसारीक सर्तींत अपात्र थारयिल्ले तरी पॅरिसांत खेळपाक तांकां मेकळीक मेळ्ळी. आयबीएच्या नेमांत दादल्यांचें एक्स, वाय गुणसुत्र आशिल्ल्या खेळगड्यांक बायलांच्या सर्तींत वांटो घेवपाक बंदी आसा. आपूण बाद थारायिल्ल्या खेळगड्यांक घेतलीं म्हूण आयबीए आयओसीचेर बेजार आसा.
तिचीं दुकां पळोवप म्हाका शक्य जालेंना अशें आयबीएचे अध्यक्ष क्रेमलेवान जाहीर केल्ल्या निवेदनांत म्हणलां. “अशा परिस्थिती विशीं हांव उदासीन ना. आमी दरेका बाॅक्सराची राखण करतले, हाची हांव खात्री दितां. ते बायलांच्या बाॅक्सिंगाक कित्याक काबार करतात तें म्हाका समजना. फकत पात्र खेळगड्यांनीच सुरक्षे खातीर रिंगांत सर्त करपाक जाय.” अशेंय तांणी सांगलें.
इटालियन प्रधानमंत्री जॉर्जिया मेलोनी हांणीय वजन आनी शारिरीक फायदे आशिल्ल्या बाॅक्सराक कॅरिनीन तोंड दिलें. ‘समान लोकां मदीं जाल्ली ही मॅच न्हय’ अशें पयर म्हणिल्लें. ह्या वादाक लागून पात्रताय नेमाचेर चड भासाभास जाल्या, जे 2021 वर्सा टोकियो खेळां सर्तींतल्या नेमाचेर आदारीत आसात आनी चालू सर्ती वेळार तातूंत बदल करपाक मेळना.
पूण ही टिका सगळ्यांक मान्य ना. डब्ल्यूबीसी बायलांची संवसारीक फेदरवेट चॅम्पियन स्काय निकोल्सनान खलीफ आनी लिन हांचो बचाव करून तांणी आपल्या पुराय कारकिर्दींत बायल म्हणून सर्त केल्या असो युक्तिवाद केलो. ऑलिंपिकांत बायलां कडेन झुजपा खातीर हे सैमीक रितीन जल्मल्ले दादले न्हय, जांणी स्वताक बायलां म्हणपाचें वा बायलां म्हूण वळखून घेवपाचें थारायलां अशें तिणें सांगलें. कॅरिनाचो फाटीं सरपाचो हो “प्रसिद्धी स्टंट” आसूं येता अशें निकोल्सनाक दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
