भांगरभूंय | प्रतिनिधी
फोंडें, प्रतिनिधी ः फोंडें निरंकालांत शुक्रारा रातीं उसरां ईनासिन आझावेदो हांच्या घरा मुखार मुखेल रस्त्याचे कुशीक आशिल्लो लायटीचो खांबो कोसळ्ळो. जाल्यार शेनवारा सकाळीं गणनाथ देवळा मुखार रस्त्याचेर व्हड झाड पडून फोंडें- दाभाळ मार्गावेली येरादारी ठप्प जाली. फाटलो एक म्हयनो वाठारांतलो रस्तो उदका पोंदा गेल्ल्यान लायटीचो खांबो कोसळ्ळ्याचो दुबाव आसा.
निरंकाला फाटलो एक म्हयनो सावन रस्तो उदका पोंदा गेल्ल्यान शुक्रारा रातीं उसरां रस्त्यार लायटीचो खांबो कोसळ्ळो. हाका लागून वाठारांतली लायट गेली. शेनवारा सकाळीं थळाव्या लोकांनी वीज खात्याच्या कर्मचाऱ्यांक कळयले उपरांत कर्मचाऱ्यांनी लायटीचो खांबो कुशीक करुन येरादारी सुरळीत केली. त्याच वेळार गणनाथ देवळा लागसार रस्त्यार पडिल्ले झाड फोंडें उजो पालोवपी दळाच्या जवानांनी कुशीक केलें.
मुखेल रस्त्याचेर झाड आनी लायटीचो खांबो पडिल्ल्यान फोंडें-दाभाळ मार्गावेली येरादारी आडकून उरली. कांय गाडयो धारबांदोड्यां मार्गांतल्यान वळयल्यो. दुधसागर न्हंयेंचें उदकाचे पातळेंत वाड जाल्ल्यान फाटल्या म्हयन्यांत 8 ते 9 फावटीं रस्तो उदका पोंदा गेलो. ताका लागून वाठारांतलो लायटीचो खांबो कोसळ्ळां आसुंये असो दुबाव थळाव्या लोकांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
