भांगरभूंय | प्रतिनिधी
भांगरभूंय । खबरां मेज
हरिद्वार : सध्या देशांत अन्नधान्यांची भेसळ हें एक गंभीर आव्हान आसून ताचो भिरांकूळ परिणाम म्हणल्यार लोकांक जावपी दुयेंसां. ‘पतंजली’न देशांतल्या अन्नधान्यांतलीं कीटकनाशकां आनी रसायनां सोदून काडपा खातीर नवें संशोधन केलां, जें “मायक्रोकेमिकल जर्नल” ह्या नामनेच्या संशोधन नेमाळ्यान उजवाडायलां.
ह्या संदर्भार आचार्य बाळकृष्ण महाराज हांणी सांगलें की ह्या संशोधनांतल्यान आतां लोकांक स्वता अन्नधान्याच्या दर्ज्याचें विश्लेशण करून अन्न सुरक्षेची खात्री करपाक मेळटली. ल्हानश्या अर्थीक फायद्याक लागून लोक खाणां- जेवणाच्या वस्तूंचो दुसऱ्या लोकांचेर जावपी वायट परिणामांचो विचार करिनासतना तातूंत भेसळ करतात. ताका लागून जीनस दूषित जाल्यात अशें तांणी सांगलें.
दाळ, कड्डण, दूद, मसालो, तूप ते भाजी आनी फळां मेरेन सगळेंच भेसळ वा शेळें मेळपाक लागलां. आमचे कुडीक पोशण दिवपा खातीर आमी फकत अन्नधान्यांचेर आदारून आसात. कुडीक निरोगी दवरपा खातीर नेमान प्रथिनां, चरबी, कार्बोहायड्रेट, जीवनसत्वां आनी खनिज आमकां गरजेचें आसता, जें आमकां फकत अन्नधान्यांतल्यानूच मेळटा.
अन्नधान्यांतल्या भेसळीचो खेळ सोंपपा खातीर ‘पतंजली’न भेसळी बगर देशी अन्न पदार्थ तयार केल्यात आनी ह्या नव्या संशोधनाक लागून भेसळ आशिल्ल्या अन्नधान्यां पासून मुक्तताय मेळटली अशें तांणी सांगलें.
आमच्या शास्त्रज्ञ पंगडाचो आनी पतंजली संस्थेच्या संशोधनाचेर आमकां अभिमान आसा, जाच्या आदारान लोक अन्न सुरक्षा सुनिश्चीत करतले आनी शाश्वत उदरगतींत योगदान दितले अशें आचार्य बालकृष्ण हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
