भांगरभूंय | प्रतिनिधी
राष्ट्रपती जो बायडेन सरकाराची ‘स्टार्टअप अँड स्टे’ येवजण
खबरां संस्था ः भारतीय स्टार्टअपांतल्यान थळावे रोजगार वाडोवप हो अमेरिकेच्या सरकाराचो हेत आसा. सद्या अमेरिकेंत भारतीयांचे 9700 स्टार्टअप आसात. सुमार दोन लाख कोटी रुपया बाजार मोल आशिल्ल्या ह्या स्टार्टअपांतल्यान दोन लाख नोकऱ्यो निर्माण जाल्यात. पांच वर्सांत तें दुपेटीन करपाची अमेरिकेची इत्सा आसा. अमेरिकेंत सध्या बेरोजगारी दर 4.10% आसा. थळावे उद्देजक रोजगाराची संद निर्माण करपाक अपेशी जाल्यात. यूएस एम्प्लॉयमेंट रिपोर्ट 2024 प्रमाण भारतीय स्टार्टअपांनी नोकरीच्यो संद वाडटल्यो.
आतां अमेरिकेंत रावपाची पद्दत सोपी जावपाची आसा. कारण राष्ट्रपती जो बायडेन हांच्या सरकारान ‘स्टार्टअप अँड स्टे’ नांवाची नवी येवजण सुरू केल्या.
‘स्टार्टअप अँड स्टे’ येवजण कितें?
हाचे प्रमाण 2 कोटी रुपयांची गुंतवणूक करून स्टार्टअप सुरू केल्यार 5 वर्सां अमेरिकेंत रावपाक मेळटलें. वेवसायीकाची घरकान्न वा घोव आनी स्टार्टअपाचे तीन जाण रावूंक शकतात. ह्या वेवसायिकाक अमेरिकेंतल्यान दोन कोटी रुपयांची गुंतवणूक घेवची पडटली. ते खातीर उद्देजकांक भारतांतल्यान स्टार्टअप प्लॅन धाडचो पडटलो. खंयचोय अमेरिकन गुंतवणूकदार दोन कोटी रुपयांची गुंतवणूक करून भारतांतल्यान वेवसायीकांक आपोवंक शकता. दुसरे तरतुदी प्रमाण भारतीय वेवसायीकाक स्टार्टअपां खातीर अमेरिकेच्या सरकारा कडल्यान थेट 88 लाख रुपया अनुदान मेळ्ळें जाल्यार तोय येवंक शकता. ऑक्टोबरांत सुरू जावपी हे येवजणेचो सुमार 60 हजार भारतीयांक लाव मेळूं येता.
पांच वर्सां उपरांत कितें?
रावपाचो काळ वाडोवंक मेळटा: भारतीय स्टार्टअप उद्देजक स्टार्टअप अँड स्टे येवजणे खाला आपलो रावपाचो काळ वाडोवंक शकतात. पूण ते खातीर वेवसायाची वाड दाखोवची पडटली. जर तें सकारात्मक आसल्यार उद्देजक पांच वर्सां रावपाक पात्र थारतलो, वा ग्रीन कार्ड मेळयतलो.
सध्या ई-2 आनी ईबी- 5 प्रकारांत व्हिसा मेळोवपा खातीर 50 कोटी रुपया मेरेन गुंतवणूक करप गरजेचें आसा. अमेरिकेंतले 35% भारतीय स्टार्टअप एआय (आर्टिफिशियल इंटेलिजन्स) क्षेत्रांत आसात. तीन वर्सांत तो दुपेटीन वाडलो. एआयची ग्रोथ रेट सगळ्यांत चड आसा. अमेरिकेंतले हेर भारतीय स्टार्टअप मुखेलपणान आयटी, सॉफ्टवेअर, फार्मा आनी शिक्षण क्षेत्रांत आसात. सध्या 80% भारतीय स्टार्ट अप सिलिकॉन व्हॅलींत आसात. हेर स्टार्टअप सिएटल- टेक्सासांत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
