मिरामार शारदा मंदिरा लागरसारचो पांयपूल काडपाच्या कामाक सुरवात

भांगरभूंय | प्रतिनिधी

9 ऑगस्ट मेरेन काम पुराय करपाचें जिल्होधिकाऱ्यांचो आदेश

पणजीः जिल्होधिकाऱ्याच्या आदेशा प्रमाण मिरामार शारदा मंदीर लागसारचो पांयपूल काडपाच्या कामाक सुरवात जाल्या. हो पांयपूल आठ दिसां भितर पुराय काडून उडोवचो असो आदेश जिल्होधिकाऱ्यांनी काडून ह्या कामा खातीर कांय अटी घाल्यात.

मिरामार शारदा मंदिरा लागसार लोकांक रस्तो हुपपा खातीर बांदिल्लो हो पूल सामकोच बाबत जाल्लो. पुलाचे स्टील कळमेवन ताका बुराक पडिल्ले. हो पूल लोकां खातीर वापराक बंद केल्लो. ह्या रस्त्यार येरदारी तशेंच शाळेंतले विद्यार्थी लेगीत व्हड प्रमाणांत आसतात. देखून घोग्यांनी पडपी पावसाक लागून हो पूल कोसळून दुर्दैवी घडणूक घडची न्हय अशी भिरांत उक्तावन हो पूल काडपाची मागणी केल्ली.

येरादारी पुलीस उपअधिक्षक हांचे सुचोवणे प्रमाण, उत्तर गोंय जिल्होधिकारी स्नेहा गिते हांणी आदेश काडलो. ह्या आदेशांत पूल काडपाचें काम हातांत घेवपा खातीर मिरामारचो जॅक सिक्वेरा रस्तो, मिरामार सर्कल ते गोंय विज्ञान केंद्रा मेरेनचो रस्तो बंद दवरपाक सांगलां. तशेंच पूल काडपाचें काम काल (शुक्रारा) सांजे 5.30 वरांचेर सुरू करून तें 9 ऑगस्ट मेरेन पुराय करपाक सांगलां.

गाडी चलोवप्यांक त्रास जावचो न्हय म्हूण रस्त्याचें डायव्हरजन केलां थंय फावो ते सुचोवण्यो आनी दिका दाखोवपी फलक उबारचे. ते भायर बंद केल्ल्या रस्त्यांच्या दोनूय वटांनी घटमूट बेरिकेडींग घालचें. बेरिकेड केलां थंय फ्ल्युरोसेन्ट रंग आनी टेपी मारच्यो. जेणेकरून रातचो हाचो अदमास येतलो अशी, अट घाल्या.

हो रस्तो सद्या बंद आशिल्ल्या कारणान मिरामार सावन दोना पावला वचपी येरादरी मिरामार सर्कला कडल्यान हॉटेल गोवा इंटरनेशनला वटेन घुंवडायल्या, आनी उपरांत ताळगांवचे वटेन दोना पावला वचूंक मेळटा. जी येरादारी दोना पावला सावन मिरामार येता तांकां गोंय विज्ञान केंद्रा कडल्यान आदर्श जंक्शना वटेन घुंवडायल्या. उपरांत जाय ते सुवातेर ह्या रस्त्या वेल्यान वचूंक मेळटा.

गोंय विज्ञान केंद्र ते मिरामार सर्कल मेरेन पुराय रस्तो लोकांक चलपा खातीर लेगीत बंद केला. तशेंच विद्यार्थ्यांक स्कुलांत हाडपा व्हरपा खातीर दुसरी वेवस्था करची अशें शारदा मंदिराक कळीत केलां. हें काम खंयचेय परिस्थितींत 9 ऑगस्ट मेरेन पुराय जावंक जाय, अशें जिल्होधिकारी स्नेहा गिते हांणी आपल्या आदेशांत म्हणलां.