भांगरभूंय | प्रतिनिधी
-म्हयन्याक 5 हजार रुपया करपाची आमदारांची मागणी
– विधवां खातीर 4 हजार रुपया दिवपी येवजणपणजीः दयानंद सामाजीक सुरक्षा येवजणे खाला मेळपी रकमेत वाड करपाचो प्रस्ताव आसा. म्हयन्याची रक्कम 5 हजारा मेरेन वाडोवपाची आमदारांची मागणी आसा. रकमेचेर बेगिनूच निर्णय जातलो. बंद आशिल्ली मुख्यमंत्री देवदर्शन येवजण परत 2 म्हयन्यांत सुरू जातली, अशें समाज कल्याण खात्याचे मंत्री सुभाष फळदेसाय हांणी सांगलें.
समाज कल्याण, न्हंय येरादारी आनी पुराभिलेख, पुरातत्व खात्याच्या मागण्यांचेर सभाघरांत चर्चा जावन मागण्यांक मान्यताय मेळ्ळी.
दयानंद सामाजीक सुरक्षा येवजणेचेर सध्या म्हयन्याक 28 कोटी रूपया खर्च जाता. म्हयन्याक 5 हजार रुपया दिवपाचे जाले जाल्यार म्हयन्याक 60 कोटी रूपया खर्च येतलो. रक्कम कितली वाडोवची, हाचेर विचार सुरू आसा, अशें मंत्र्यांनी सांगलें.
विधवा बायलां खातीर म्हयन्याक 4 हजार रूपया दिवपी येवजण सुरू जातली. विधवा बायलेचे भुरगे 21 वर्सां सकयल आसा, जाल्यारूच येवजणेचो लाव मेळटलो. बायल विधवा जाले उपरांत गृहआधाराची येवजण सोडून विधवा खातीरचे येवजणे खातीर येवजणेचो लाव मेळपाक कांय म्हयने वतात. हे स्थितींत विधवां खातीर 4 हजार रुपया दिवपी नवी येवजण सुरू जातली. 22 सरकारी इमारतींनी दिव्यांगां खातीर खासा सुविधा तयार जाल्या. हाचेर सरकारान 4.13 कोटी रूपया खर्च केल्या. 800 विद्यालयांची पळोवणी पुराय जाल्या. सीएसआर कार्यावळी खाला ओएनजीसी कडेन निधी खातीरची चर्चा सुरू आसा. तशेंच भुरग्यां कडेन लक्ष दिवपा खातीर दिव्यांग विद्यार्थ्यांंच्या पालकांक कार्यालयीन वेळांत सूट दिवपाचो प्रस्ताव आसा. कोवीड काळांत समाज कल्याण खात्यान कोवीड सहाय्यता येवजण सुरू केल्ली. हे येवजणेचो 75 हजार 757 जाणांनी लाव घेतला. येवजणे खातीरचे 25 हजार 995 अर्ज कागदपत्रांक लागून प्रलंबीत आसात.
अनुसूचीत जाती (एससी), अनुसूचीत जमाती (एसटी) आनी हेर मागास वर्ग विद्यार्थ्यां खातीर (ओबीसी) ज्यो येवजण्यो आसात, ताचो लाव खूब उणे विद्यार्थी घेतात. हे येवजणे विशीं सरकार जागृताय करतले. अटल आसरा येवजणे खाला 29 कोटी रूपयांचो निधी खर्च जाला.
समाजामदी जी विषमता आसा, ती पयस करप हे समाज कल्याण खात्याचे उद्दिश्ट आसा. सगळ्याक समान संधी मेळची, अशें यत्न सुरू आसा.
————-
सोलर फेरी भाड्याक दिवपाचो प्रस्ताव
सोलर फेरीबोट तीन म्हयने चलली. ही फेरीबोट भाडेपट्टीचेर दिवपाचो प्रस्ताव आसा. खात्या कडेन 33 फेरीबोटी आसात. हातूंतले 30 फेरीबोटी 18 मार्गांचेर चलतात. आनीक दोन रो रो फेरी येवपाच्यो आसात. फेरीबोटी चलोवपा खातीर वर्साक 56 कोटी खर्च येता. तिकेटींतल्यान फकत 70 लाखांची येणावळ येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
