भांगरभूंय | प्रतिनिधी
हांव एमडी जावचे पयलीं घोटाळो जाल्ल्याचो दावो
पणजी: गोवा डेरींत कच्च्या म्हालाचे खरेदीतल्या घोटाळो प्रकरणांत आपलो कसलोच हात ना. हो घोटाळो 2018 वर्सा जाल्लो. आपणे 2019 वर्सा डेरीच्या वेवस्थापकी संचालकपदाची (एमडी) सुत्रां हातांत घेतलीं. अशें आदले एमडी डॉ. अनील फडते हांणी ‘भांगरभूंय’ कडेन उलयतना स्पश्ट केलें.
11 फेब्रुवारी 2021 दिसा म्हाका गोवा डेरीच्या एमडीपदा वेल्यान निलंबीत केल्लो. उपरांत 6 मार्च 2023 दिसा गोवा डेरीचे अध्यक्ष राजेश फळदेसाय हांणी म्हजे आड कागाळ केली. ते प्रमाण डेरी प्रशासनान ही कागाळ फोंडें पुलीस स्टेशना कडेन वर्ग केली. उपरांत 19 मार्च 2024 दिसा तेन्नाचे एमडी डॉ. वाय. डब्ल्यू. राणे हांणी हाची याद करून दिवपी नोट फोंडें पुलीस स्टेशनाक धाडून दिल्लो. पूण ह्या प्रकरणांत म्हजेर एफआयआर दाखल केली ना.
उपरांत तीन वांगडी समिती कडल्यान म्हजी चवकशी सुरू केल्ली. सांगपाची गजाल म्हणल्यार गोवा डेरीतल्या कच्च्या म्हालाचे खरेदीत जो घोटाळो जाल्लो तो 2018 वर्सा जाल्लो. उपरांत एका वर्सान म्हणल्यार 16 ऑक्टोबर 2019 दिसा म्हजी एमडीपदार नेमणूक जाली. उपरांत जी कच्च्या म्हालाची खरेदी केली ती पांच जाणांच्या स्वतंत्र निविदा समितीक विस्वासांत घेवनूच केली. ताका लागून गोवा डेरीतल्या खंयच्याच घोटाळ्यांत म्हचो वांटो ना अशेंय डॉ. फडते हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
