भांगरभूंय | प्रतिनिधी
पणजीः हॉटेल आनी कारखान्यांचो कोयर एकठांय करपी कंत्राटदारांक घन कोयर वेवस्थापन म्हामंडळा खाला हाडून कोयर एकठांय करपाची जापसालदारकी राज्य सरकार घेतले अशी हमी मुख्यमंत्री डॉ. प्रमोद सावंत हांणी शुक्रारा विधानसभा सभाघरांत उलयतना दिली.
कुठ्ठाळीचे आमदार आंतोन वास हांणी प्रस्नोत्तरा वेळार हे संबंदी एक प्रस्न मांडिल्लो. 7 जुलय 2024 दिसा कुठ्ठाळी कोमुनिदादीच्या जमनींत एक ट्रक कोयर उडयतालो. ट्रक चालकाक धरून पुलिसांच्या सुवादीन केलो. पूण न्यायालयान ताचे सयत ट्रकाचीय सुटका केल्या. भौशीक सुवातेर तशेंच कोमुनिदादीचे जमनींत कोयर उडोवपी ट्रकांचे परवाने स्थगीत करतले अशें आश्वासन मुख्यमंत्री डॉ. प्रमोद सावंत हांणी कांय दिसां आदीं सभाघरांत दिल्लें. मागीर ह्या ट्रकाचो परवानो कित्याक स्थगीत करूंक ना, असोय प्रस्न तांणी केला.
मजगतीं, आंतोन वाज हांच्या प्रस्नाक जाप दितना मुख्यमंत्र्यानी सांगलें, कुठ्ठाळी कोमुनिदादीचे जमनींत कोयर उडयलो तो ताचे कडल्यान उखलून घेतले. इतलेंच न्हय जाल्यार हॉटेल आनी कारखान्यांतल्यान कोयर एकठांय करपी खाजगी कंत्राटदारांक घन कोयर वेवस्थापन म्हामंडळा कडेन नोंदणी करपाक सांगून कोयर एकठांय करपाची जापसालदारकी राज्य सरकार घेतले असोय उल्लेख मुख्यमंत्र्यांनी केलाे.
……………………………..
चार लाखांच्या बॉण्डाचेर सुटका
कुठ्ठाळी कोमुनिदाद जमनींत ट्रकांनी कोयर उडोवपाची कागाळ मेळ्ळे उपरांत ताची नोंदणी केल्या. ही गजाल न्यायालयांत पावले उपरांत ताका 4 लाखांचो बाँड घेवन ताची सुटका केल्या. ते भायर ट्रकाकय सोडलो, अशी म्हायती कोयर वेवस्थापन मंत्री बाबूश मोंसेरात हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
