भांगरभूंय | प्रतिनिधी
म्हापशें: गीरकारवाडो, धारगळे बदल्याचे भावनेंतल्यान 2015 वर्सा घडिल्ल्या जाण्ट्या जोडप्याच्या दोट्टी खून प्रकरणांतले तिनूय दुबावीत आरोपींची पुरावो नाशिल्ल्यान निर्दोश सुटका केली. म्हापशें फास्ट ट्रॅक न्यायालयाच्यो न्यायाधीश शबनम शेख हांणी हो निवाडो दिलो.
मयत जॉयशी कुतिन्हो आनी रेजिनाल्ड कुतिन्हो हांच्या खून प्रकरणाच्या भा.दं.सं.च्या 449, 392, 302 आनी 34 खटल्यांतल्यान अनील झाटे, राजेश वीर आनी अनंत वीर हांची सुटका केली.
दुबावीत आरोपी आड सरकारी पक्ष गरजेचे ते पुरावे आनी गुन्यांव सिद्ध करपाक अपेशी थारले असो निश्कर्श न्यायालयान नोंद केलो.
तशेंच खटल्यांतलो मुखेल आरोपी अनील झाटे हाणें न्यायालयांत साक्ष दितना सांगलें, पुलिसांनी आपल्याक व्हड प्रमाणांत मार घालो. तशेंच ताच्या गुप्त भागाक शॉक दिलो. ह्या असह्य विजेच्या धक्क्यांतल्यान सुटका करपा खातीर आपणे मयतांची हत्या केल्ल्याचें पुलिसांक सांगलें. पॉलिग्राफी चांचणिकूय आपूण तयार आशिल्लों. पूण पुलिसांनी ही चांवणी घेतली ना आनी आपूण निर्दोश आसा.
साक्षिदारांचे साक्षी पुराव्यांत मयत जॉयसी कुतिन्हो हांच्या घरा मुखार भौशीक रस्तो आशिल्लो. कोयत्यान तांचो खून जाल्लो आसत जाल्यार तांणी नक्कीच मजती खातीर बोवाळ करपाचो. पूण भौशीक रस्त्या वेल्यान वचपी कोणाचीय चवकशी केली ना. साक्षिदारांच्या पुराव्यांतूय विरोधाभास आसा. रेकॉर्डाचेर आयिल्ले पुरावे आरोपीक दोशी थारावपा खातीर फावोशे नात असो निश्कर्श निवाड्यांत न्यायाधिशांनी नोंद केलो.
सरकारी पक्षा वतीन सरकारी वकील प्रशिला नारुलकार हांणी जाल्यार दुबावितांचे वतीन अॅड. किशोर भगत, अॅड. बाबू कोरगांवकार आनी अॅड. नम्रता गावडे हांणी युक्तीवाद केलो.
मजगतीं, ही खुनाची घडणूक फाटल्या 16 सप्टेंबराचे रातीं ते 17 सप्टेंबराच्या सकाळी घडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
