प्रस्तावीत मरिना प्रकल्पाचेर अजून निर्णय जावंक ना

भांगरभूंय | प्रतिनिधी

पणजी: लोकांचो विरोध आशिल्ल्या नावशीच्या प्रस्तावीत मरिना प्रकल्पाचेर सरकारान अजून कसलोच निर्णय घेवंक ना. प्रदुशण नियंत्रण मंडळा कडेन लेगीत कंसेंट टु इस्टाब्लीश खातीर अजून मेेरेन अर्ज येवंक ना, अशी म्हायती लेखी जापेंतल्यान मेळ्ळ्या.

आमदार विरेश बोरकार हांच्या प्रस्नाक पर्यावरण मंत्री अालेक्स सिक्वेरा हांणी ही लेखी जाप दिल्या.

मेसर्स खरगवाल कन्स्ट्रक्शन प्रायव्हेट लिमिटेड हांचो नावशी हांगा मरिना प्रकल्प स्थापन करपाचो प्रस्ताव आसा. ह्या प्रस्तावाचेर गोंय दर्यादेग वेवस्थापन प्राधिकरणा कडल्यान अजून मेरेन निर्णय जावंक ना.

मेसर्स खरगवाल कन्स्ट्रक्शनान भौशीक सुनावणी घेवपा खातीर 2017 वर्सा अर्ज केल्लो. ह्या अर्जा प्रमाण 26 जुलय 2020 हे दिसा भौशीक सुनावणी निश्चीत केल्ली. ते उपरांत ही भौशीक सुनावणी फुडें धुकलपाचो निर्णय जालो. दर्यादेग वेवस्थापन आराखडो निश्चीत जाले उपरांत भौशीक सुनावणी घेवप शक्य जातलें, अशें जिल्होधिकार्‍यांनी कळयले. जिल्होधिकार्‍यांच्या आदेशाक खरगवाल कन्स्ट्रक्शनान खंडपिठांत आव्हान दिले. सुनावणी घेवन खंडपिठान 5 एप्रील 2022 दिसा खरगवाल कन्स्ट्रक्शनाची याचिका भायरायली.

दर्यादेग वेवस्थापन आराखड्याक मान्यताय मेळ्ळे उपरांत खरगवाल कन्स्ट्रक्शनान भौशीक सुनावणी घेवपा खातीर प्रदुशण नियंत्रण मंडळा कडेन परतून अर्ज केलो. 19 जुलय 2023 दिसा हो अर्ज केलो.

हो प्रकल्प पर्यावरण मुल्यांकन अधिसुचोवणी 2006 खाला येना. तज्ञ समितीचे बसकेंत असो निर्णय जाला. हाका लागून भौशीक सुनावणी घेवपाची गरज ना, अशें पत्र खरगवाल कन्स्ट्रक्शन प्रायव्हेट लिमिटेड कंपनीन प्रदुशण नियंत्रण मंडळाक धाडला. तरी प्रकल्पाक हेर घटनात्मक संस्थांच्या परवान्यांची गरज आसा.