भांगरभूंय | प्रतिनिधी
ही इमारत दुरुस्त करून थळाव्यांक दिवपाची मागणी जाल्ली
फोंडें, प्रतिनिधी: धारबांदोडें- थातोडच्या सरकारी मुळावे शाळेच्या वापरा बगर पडून आशिल्ले इमारतीचें पांखें कोसळ्ळें. फाटल्या कांय दिसांनी पावसांत हें पांखें कोसळ्ळें. इमारतीची दुरुस्ती करून थळाव्या लोकांक ती उपलब्ध करून दिवपाची मागणी स म्हयन्यां आदीं पालकांनी शिक्षण खात्या कडेन केल्ली. मात अजूनय दुरुस्तीचें काम करपाची प्रक्रिया सुरु जावंक नाशिल्ल्यान तांणी तिडक उक्तायल्या.
शाळेची इमारत फाटल्या कांय वर्सां सावन वापरा बगर आसा. सर्व शिक्षण अभियाना वतीन उबारिल्ले नवे इमारतींत सध्या १८ विद्यार्थ्यांक शिकयतात. तेच इमारती लागसारा आशिल्ले आदले इमारतीचें पांखें कांय दिसां आदीं कोसळ्ळें. स म्हयन्यां आदीं पालकांनी तशेंच थळाव्यांनी सयो घेवन शिक्षण खात्याक आदले इमारतीची दुरुस्ती करपाची मागणी केल्ली.
ही इमारत दुरुस्त करून थळाव्या लोकांक वा महिला मंडळाक बसका घेवपा खातीर दिवपाची मागणी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
