भांगरभूंय | प्रतिनिधी
वाळपयच्या उदका पुरवण कार्यालयाचेर व्हरतले मोर्चा
वाळपय, प्रतिनिधी: सत्तरी म्हालांतल्या मुरमुणे गांवांत फाटल्या णव दिसां सावन पिवपाचें उदक येना. हांगा टँकरान उदकाची पुरवण जाता, मात तेंय उदक उणें पडपाक लागलां. हाका लागून ग्रामस्थांनी तिडक उक्तायल्या. पैकूळच्या उदका शुद्धीकरण प्रकल्पांतले पंप इबाडिल्ल्यान ही समस्या निर्माण जाल्या. फाटल्या णव दिसां पसून उदका पुरवण अधिकारी फकत आस्वासनां दितात. मात प्रत्यक्षांत मोडिल्ल्या पंपां कडेन आडनदर केल्ल्याचो आरोप ग्रामस्थांनी केला. दोन दिसांनी उदकाची समस्या पयस जावंक ना जाल्यार सोमारा वाळपयच्या उदका पुरवण कार्यालयाचेर मोर्चा व्हरतले, अशी शिटकावणी ग्रामस्थांनी दिल्या.
पैकुळ उदकाच्या प्रकल्पांत इबाड
मेळिल्ले म्हायती प्रमाण, उदका प्रकल्पांत इबाड जाला. एक पंप मोडला. ताका लागून उदकाचे पुरवणेचेर परिणाम जाला. ताचो फटको मुरमुणे गांवाक बसला. हाका लागून पिवपाच्या उदकाची समस्या निर्माण जाल्या. जायते फावटीं कागाळी केल्यो मात हाचे कडेन आडनदर जाता. हो पंप दुरुस्त जायना तो मेरेन गांवाक पिवपाचें उदक मेळप शक्य ना. ताका लागून सध्या तरी टँकराच्या उदकाचेर गरज भागोवची पडटा.
ग्रामस्थांनी दिल्ले म्हायती प्रमाण, सध्या गांवाक टँकरांतल्यान उदक दितात. मात ती पुरवण नेमान जायना. दोन दिसांनी उदकाची पुरवण करतात. हें उदक लोकांक पावना. ताका लागून फाटल्या णव दिसां सावन उदका खातीर तळमळचें पडटा. हे विशीं गांवांतल्या लोकांनी खर तिडक उक्तायल्या. वाळपय भौशीक उदका पुरवण विभागांत कार्यरत आशिल्लो अधिकारी वर्ग हो कामा पसून पयस पळपाचो यत्न करता, असो आरोप लोकांनी केला.
सोमारा ग्रामस्थांचो मोर्चा
समस्या पयस जायनाशिल्ल्यान बिरेस्तारा ग्रामस्थांनी बसका घेतली. तातूंत उदकाचे समस्ये विशीं तिडक उक्तायली. दोन दिसांनी पंप दुरुस्त करून गांवांत पिवपाच्या उदकाची समस्या सुदारूंक ना जाल्यार सोमारा लोक वाळपयच्या उदकापुरवण कार्यालयाचेर कळशे घेवन मोर्चा व्हरपाचो निर्णय घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
