भांगरभूंय | प्रतिनिधी
आग्रा, खबरां संस्था ः हांगा एक धक्को दिवपी घडणूक उजवाडाक आयल्या. जमनीच्या वादाक लागून चार जाणांनी एका मनशाक मारपेट करून जितोच जमनींत पुरलो. पूण, रस्ताद सुण्यांनी जमीन उस्तून ताका घांस मारलो तेन्ना ताका शुद्ध आयली आनी तो थंयच्यान भायर सरलो. त्या मनशान तसो दावो केला. रूप किशोर अशें ताचें नांव.
18 जुलयाक आग्राच्या अरतोनी वाठारांत अंकीत, गौरव, करण आनी आकाश ह्या चार जाणांनी ताका मारपेट केल्ल्याचो दावो ताणें केला. उपरांत हांव बेशुद्ध पडलो म्हणून तांकां दिसलें हांव मेलो. मागीर तांणी म्हाका जमनींत पुरलो असोय दावो रूप किशोरान केला.
ताणें फुडें सांगलें की ताका पुरिल्लो ते सुवातेर रस्ताद सुण्यांनी वास घेवन मांस खावपाच्या हेतान जमनी खणली आनी ताका लागून तो शुद्धीर आयलो आनी थंयच्यान भायर सरलो. तो थंयच्यान भायर सरून गांवांत येतना थळाव्या लोकांनी ताका वळखून हॉस्पिटलांत दाखल केलो. सध्या ताचेर उपचार सुरू आसात.
रुप किशोराचे आवयन दिल्ले म्हायती प्रमाण, चारूय आरोपींनी आपल्या पुताक जबरदस्तीन घरांतल्यान आपोवन व्हेल्लो. ते उपरांत ताका खूब मारलो आनी मागीर तांणी ताका शेतांत पुरलो. चारूय आरोपींचो सोद घेवपाक सुरवात केल्या अशें वरिश्ठ पुलीस निरिक्षक नीरज शर्मा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
