भांगरभूंय | प्रतिनिधी
वायनाड, खबरां संस्था: केरळांतल्या वायनाड जिल्ह्यांत तीन दिसां आदीं पालसणां कोसळपाच्यो दोन घडणुको घडल्यो. हे घडणुकेंत २९९ जाणांक मरण आयलां. १९० परस चड नागरीक जखमी जाले. जाल्यार २०० परस चड नागरीक बेपत्ता आसात. राज्य शासन आनी केंद्र सरकाराचीं मजत पथकां मातयेचे राशी पोंदाक आडकल्ल्या लोकांक भायर काडपाचो यत्न करतात. पुलीस आनी उजो पालोवपी दळूय वाटावपाचे मोहिमेंत देवलां. अशें आसतना एक वेगळी बातमी मुखार आयल्या. वायनाडांतले एके शाळेंत आठवेक शिकपी चलयेन कांय म्हयन्यां पयलीं शाळेच्या मासिकांत अशेच एके सैमीक आपत्तीचो उल्लेख केल्लो. लाया अशें ते चलयेचें नांव. तिणें बरयल्ली लघुकथा खरी थारिल्ल्याची चर्चा सुरू जाल्या.
पोरूं शाळेच्या मासिकांत ताणें आपलेच पिरायेचे एके चलयेची काणी बरयिल्ली. ‘‘काणयेंतली चली गांवां लागसारच्या एका घसघश्या कडेन वता आनी भितर पडून मरता. ती चली एक सवणें जावन गांवांत येता. गांवांतल्या लोकांक हुंवाराच्या धोक्या विशीं सुचयता. ती चली सवणें जावन गांवांतल्या भुरग्यांक मेळटा आनी सांगता, गांवांतल्यान पळून वचात. फुडल्या काळांत व्हड संकश्ट येवपाचें आसा. भुरगींय ताचें आयकून पळटात आनी एका दोंगरा कडेन येवन रावतात. दोंगरा वयल्यान बर्याच वेगान व्हांवत येवपी उदक पळयतात. तेन्नाच तें सवणें सुंदर चलयेंत रुपांतरीत जाता आनी कांय खिणांतूच थंयच्यान गायब जाता.’’
लायाचो चुरामला हो पुराय गांव पालसणां कोसळ्ळ्या उपरांत मातये पोंदाक गेला. हातूंत तिच्या बापायक मरण आयलां. लायाचे शाळेंतलीं ३२ भुरगीं मेल्यांत. जाल्यार तिच्या शाळेंतल्या कांय विद्यार्थ्यांनी आवय-बापूय आनी भावंडां वगडायल्यांत. लायाच्या शाळेच्यो जायत्यो कुडी कोसळ्ळ्यात. शाळे लागसारच्यान व्हावपी न्हंयेचें उदक शाळेंत भितर सरलां आनी शाळेंतलें सगळें सामान व्हांवून गेलां.
लायाचे शाळेचे मुख्याध्यापक व्ही. उन्नीकृष्णन हांणी, पावस आतां उणो जाला. ताका लागून आमकां दिसता आमची ह्या संकश्टांतल्यान सुटका जाल्या. आमी पांच शिक्षक चुराम हांगा भाड्याक रावतात. आमच्या घरा फाटल्यान बरोच व्हड दोंगर आसा. सप्तकभर घोग्यांनी पावस पडटालो. पालसणां कोसळपाच्या भंयान आमी ते दीस शाळेंतूच रावपाचें थारायलें. मात, पावस कमी जालो म्हूण कांय वेळान आमी घरा परतले. तेच दीस न्हंयेचें उदक शाळेंत भितर सरलें आनी पालसणां कोसळ्ळीं. आमी तेन्ना शाळेंत आसले जाल्यार आमकां मरण येवपाचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
