भांगरभूंय | प्रतिनिधी
पणजी : जमनीच्या रुपांतरणाचे सगळे अधिकार नगर नियोजन खात्याक दिवपाची तजवीज आशिल्लें नगरनियोजन दुरुस्ती विधेयक सभाघरांत सादर जालें. कलम 19 आनी कलम 134 मदीं दुरुस्ती करपाची तजवीज आसा. हें विधेयक संमत जाले उपरांत जमीन रुपांतरणा संबंदांत न्यायालयान दिल्ले निवाडे लेगीत रद्द जातले. एकादो वाठार ओडीपींतल्यान भायर काडले उपरांत जमीन रुपांतरणा विशींच्या प्रस्तावांक मान्यताय दिवपाचे अधिकार नगरनियोजन खात्याक दिवपाची तजवीज विधेयकांत आसा. तशेंच कलम 134 खाला मान्यताप्राप्त यंत्रणेन उदरगतीच्या कामांक दिल्ले परवाने हेर यंत्रणांक मान्य करचे पडटले. नगरनियोजन मंत्री विश्वजीत राणे हांणी हें विधेयक सभाघरांत सादर केलें.
कायद्याच्या कलम 19 मदीं उपकलम 3 चो आस्पाव जातलो. जेन्ना ओडीपींतल्यान एकादो वाठार वा पुराय वाठार भायर काडटात, तेन्ना त्या वाठारांतल्या पयलींच्या प्रस्तावांचो विचार करपाची तजवीज आसा. (नॉन प्लॅनींग वाठार आसा मेरेन).
तशेंच एकादो वाठार उदरगत वाठार (प्लॅनींग एरिया) म्हूण कलम 18 खाला जाहीर जालो काय ओडीपी जाय मेरेन विकास कामां प्रादेशीक आराखड्या प्रमाण निश्चीत जातलीं.
कलम 134 मदीं उपकलम 2 खाला ह्या उपकलमाचो आस्पाव जातलो.
नगरनियोजन कायद्या खाला मान्यताप्राप्त यंत्रणा जेन्ना उदरगतीच्या कामांक मान्यताय दिता तेन्ना ती मान्यताय सगळ्या यंत्रणाचेर बंधनकारक आसतली. कळंगूटे आनी हडफडें ओडीपी सरकारान पयलीं अधिसुचीत केल्ले आनी उपरांत रद्द केले. ओडीपी अधिसुचीत जाले उपरांत ज्या प्रस्तावांक मान्यताय दिल्ली, ती कायम उरपा खातीर सरकारान अध्यादेश जारी केल्लो.
गोंय नगर नियोजन दुरूस्ती अध्यादेशाक राज्यपालांनी 29 फेब्रुवारी 2024 ह्या दिसा मान्यताय दिल्ली. ह्या अध्यादेशाचें कायद्यांत रूपांतरण करपाच्या हेतान हें दुरुस्ती विधेयक सादर जालां. सभाघरात गोंय क्लिनिकल इस्टाब्लिशमेंट दुरूस्ती विधेयक, गोंय नगरपालिका दुरूस्ती, गोंय आयपीबी एक खिडकी दुरूस्ती आनी पणजी म्हापालिका दुरूस्ती विधेयकां सादर जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
