विरोधकांचे हरकती उपरांत उद्देगीक दुरुस्ती विधेयक घेतलें फाटीं

भांगरभूंय | प्रतिनिधी

सभाघरांत तीन विधेयकां जालीं संमत

पणजी : सभाघरांत बिरेस्तारा गोंय पंचायत राज दुरुस्ती, भारतीय स्टॅम्प कायदो दुरुस्ती आनी गोंय एस्चीट, फोरफीचर आनी बोना वेकंशिया विधेयकांक मान्यताय मेळ्ळी. हीं विधेयकां मंगळारा सभाघरांत सादर जाल्लीं. विरोधकांच्या हरकती उपरांत गोंय उद्देगीक दुरुस्ती विधेयक उद्देग मंत्री मॉवीन गुदिन्हो हांणी फाटीं घेतलें.

पंचायत मंत्री मॉवीन गुदिन्हो हांणी पंचायत राज दुरुस्ती विधेयक सभाघरांत विचारांत घेवन संमत केलें. कायद्यांत कलम 18 मदीं इंडियन एवीडन्सच्या जाग्यार भारतीय साक्ष अधिनीयम असो आस्पाव जातलो. तशेंच कलम 219 मदीं इंडियन पेनल कोडच्या जाग्यार भारतीय न्याय संहिता असो आस्पाव जातलो.

खण लिजा खातीरची स्टॅम्प ड्युटी उणी करपा खातीर भारतीय स्टॅम्प कायदो 1899च्या कलम 3 ए मदीं दुरुस्ती करपाक सभाघरान मान्यताय दिल्या. हें विधेयक 21 आड 7 मतांनी संमत जालें. हाका लागून खण लिजा खातीर स्टॅम्प ड्युटी 6 पट लागू जातली. पयली ती 15 पट आशिल्ली.

येणावळ खात्याचे मंत्री बाबूश मोंसेरात गोंय एस्चीट, फोरफीट आनी बोना वेकंशिया विधेयक विचारांत घेवन संमत केलें.

एखादी जमीन वा मालमत्तेक धनी ना वा मेले उपरांत मालमत्तेच्या वापरा खातीर वारसदार ना, जाल्यार ती जमीन वा मालमत्ता ताब्यांत घेवपाचो अधिकार सरकाराक मेळटलो. वारसदार नाशिल्ली मालमत्ता सरकाराक ताब्यात घेवपाची तजवीज गोंय, एस्चीट, फोरफीट आनी बोना वेकंशिया विधेयकांत आसा.

उद्देग मंत्री मॉवीन गुदिन्हो हांणी गोंय उद्देगीक उदरगत दुरुस्ती विधेयक सभाघरांत विचारांत घेतलें. गैरवेवहार करपी संचालकांक अपात्र करपा सयत संचालक मंडळाच्या बसकांच्या आंकड्यांत बदल करपाची तजवीज आशिल्ली.

उद्देगीक म्हामंडळाच्या अधिकाऱ्याक तपासणी करपाचे अधिकार (कलम 14 बी) पायपलायन घालपाचे अधिकार (कलम 14 ए) दिवपाची तजवीज आशिल्ली. विरोधकांचे हरकती उपरांत हें विधेयक उद्देग मंत्र्यांनी फाटीं घेतलें.