भांगरभूंय | प्रतिनिधी
भलायकी मंत्री विश्वजीत राणे हांची लेखी जाप
पणजी: गोंयांत 2021-22 ते 2023-24 मजगतीं, दिसाक सरासरी 3 जाणांचे मुत्रपिंड निकामें जायत आसा. ह्या तीन वर्सांत राज्यांतल्या 3098 जाणांनी गोंय वैजकी म्हाविद्यालयांत (गोमॅकॉ) मुत्रपिंड निकामें जाल्ले खातीर उपचार घेतल्यात. भलायकी मंत्री विश्वजीत राणे हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे विशीं आमदार आलेक्स रेजिनाल्ड हांणी तारांकीत प्रस्न उपस्थीत केल्लो.
जापेंतल्यान दिल्ले म्हायती प्रमाण 2021-22 वर्सा गोमॅकाँत मुत्रपिंड निकामें जाल्ल्याच्या 883 दुयेंतींची नोंद जाल्ली. हातूंत 633 दादले जाल्यार 250 बायलांचो आस्पाव आशिल्लो. पिरायेच्या गटा प्रमाण पळयत जाल्यार 883 पैकीं सगल्यांत चड 375 दुयेंती हे 40 ते 60 पिराय गटांतले आशिल्ले. उपरांत 60 ते 80 पिराय गटांतले 335 दुयेंती आशिल्ले. जाल्यार 20 ते 40 पिराय गटांतले 126 दुयेंती आशिल्ले.
म्हाल वार पळयत जाल्यार ह्या वर्सा सगल्यांत चड 140 दुयेंती हे तिसवाडींतले आशिल्ले.
2022-23 वर्सा 1005 दुयेंतींचे मुत्रपिंड निकामें जाल्लें. हातूंत 686 दादले जाल्यार 319 बायलांचो आस्पाव आशिल्लो. पिराय गटा प्रमाण 1005 पैकी सगल्यांत चड 448 दुयेंती हे 60 ते 80 पिराय गटांतले आशिल्ले. उपरांत 40 ते 60 वर्सा पिराय गटांताले 379 दुयेंती आशिल्ले. जाल्यार 20 ते 40 पिराय गटांतले 101 दुयेंती आशिल्ले. म्हाल वार पळयत जाल्यार ह्या वर्सा सगल्यांत चड 166 दुयेंती हे बार्देस म्हालांतले आशिल्ल्याचें जापेंत म्हणलां.
2023-24 वर्सा मुत्रपिंड निकामें जाल्ल्या दुयेंतींचे संख्येंत वाड जाली. ह्या वसॉ गोमॅकाँत मुत्रपिंड निकामें जाल्ल्याच्या 1210 दुयेंतींची नोंद जाल्ली. हातूंत 798 दादले जाल्यार 412 बायलांचो आस्पाव आशिल्लो. पिराय गटा प्रमाण 1210 पैकी सगल्यांत चड 541 दुयेंती हे 60 ते 80 पिराय गटांतले आशिल्ले. उपरांत 40 ते 60 पिराय गटांतले 451 दुयेंती आशिल्ले. जाल्यार 20 ते 40 पिराय गटांतले 140 दुयेंती आशिल्ले. ह्या वर्सा सगल्यांत चड 185 दुयेंती हे बार्देस म्हालांतले आशिल्ले.
दादल्यांची टक्केवारी चड
जापे प्रमाण फाटल्या तीन वर्सांत गोमॅकाँत मुत्रपिंड निकामें जाल्ल्या वट्ट 3098 दुयेंती पैकीं 68.33 टक्के दुयेंती (2117) दादले जाल्यार 31.66 टक्के दुयेंती (981) बायलां आशिल्लीं. वट्ट दुयेंती मदीं 11.84 टक्के म्हणल्यार 367 दुयेंती हे 20 ते 40 पिराय गटांतले आशिल्ले.
गोडेंमूत, रक्तदाब मुखेल कारण
जापेंत म्हणलां की, रगतांतली साकर आनी रक्तदाबाची पातळी नियंत्रीत नासल्यार गोडेंमूत आनी उच्च रक्तदाबा सारकीं दुयेंसां जातात. हाकाच लागून मुखेलपणान मुत्रपिंडाचेर परिणाम जाता. भलायकी संचालनालयाच्या म्हायती प्रमाण 25 ते 30 टक्के मुत्रपिंड निकामें जावपाक गोडेंमूत कारण थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
