भांगरभूंय | प्रतिनिधी
मडगांव, प्रतिनिधी : माजोड्ड्यां आदवाडोवेल्या क्लिफर्ड डिसिल्वा हांचे बेकरेक उजो लागपाची घडणूक बिरेस्तारा सकाळीं घडली. हातूंत बेकरेंतलें सामान जळ्ळें आनी लायटीच्या सामानाचें लुकसाण जालें. बेकरी धनयाचे म्हायती प्रमाण सुमार पांच लाखांचें लुकसाण जालें.
माजोड्डेंच्या क्लिफर्ड डिसिल्वा हांचे बेकरेक उजो लागपाची घडणूक बिरेस्तारा सकाळीं सुमार साडे स वरांचेर घडली. उजो लागिल्ल्याचें कळटांच डिसिल्वा हांणी वेर्णा उजो पालोवपी दळाक कळयलें. दळाचे जवान घडणुके सुवातेर पावले. तो मेरेन डिसिल्वा आनी कुटुंबीयांनीच उज्याचेर उदक मारून उजो पालयलो. ह्या उज्यांत बेकरेंतलें लायटीचें सामान आनी खाण करपा खातीर दवरिल्लें सामान आनी जिन्नस उज्यांत लासून गोबोर जालें. हो उजो शॉर्टसर्कीटाक लागून लागिल्ल्याचो अदमास उक्तायला. उजो पालोवपी दळान बेकरेंतल्या उज्याचे स्थितीची पळोवणी केली. बेकरी धनयाचे म्हायती प्रमाण उजो लागिल्ल्यान बेकरेचें सुमार पांच लाखांचें लुकसाण जालां.
दोन घरांच्यो वणटीय कोसळ्ळ्यो
पावसाक लागून जायते कडेन झाडां, घरां कोसळपाचे प्रकार घडतूच आसात. पावसाक लागून मातयेच्या घरांक धोको निर्माण जाला. बिरेस्तारा सकाळींम मडगांव ओल्ड मार्केट वाठारांतल्या शेरॉन मराईन डिसोझा हांच्या मातयेच्या घराची वणट पडून लुकसाण जालें. तशेंच आंबेलीच्या आदल्या मातयेच्या घराची वणट कोसळून लुकसाण जालें. ह्या वण्टींच्या लागसारा कोणूच नाशिल्ल्यान कोणाक कांय जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
