भांगरभूंय | प्रतिनिधी
प्रवाह समिती कडल्यान योग्य वेळार पळोवणी
पणजी : सर्वोच्च न्यायालयांत म्हादय संबंदीचे याचिकेंत गोंयची बाजू घटमूट आसा. गोंय सरकार गंभीरतायेन विचार करता. प्रवाह समितीन योग्य वेळार म्हादय पात्राची पळोवणी केल्या, अशें उदका पुरवण मंत्री सुभाष शिरोडकार हांणी सभाघरांत सांगलें.
उदका पुरवण तशेंच सहकार खात्यांच्या मागण्यांचेर चर्चा जावन मागण्यांक मान्यताय मेळ्ळी. चर्चेक जाप दितना उदका पुरवण खात्याच्या मंत्र्यांनी ही म्हायती दिली.
राज्यांत बोरवेलींचो आंकडो वाडत आसा. बेकायदाे बोरवेलींचेर कारवाय करपी मोहीम सुरू जातली. तशेंच दर वर्सा बोरवेलींचो आंकडो उणो करपाचेर सरकाराचो भर आसतलो.
राज्यांत उदकाचो उणाव ना. तरी फुडाराक उदकाचो उणाव जावचो न्हय, म्हूण नियोजन सुरू आसा. हाचोच भाग म्हूण कुशावती न्हंयच्या उदकाचो उपसा करून उदकाचो वापर जातलो. तशेंच राज्यांत 100 बंधारे बांदपाचो प्रस्ताव आसा. 2026 मेरेन राज्यात बंधाऱ्यांचो आंकडो 500 मेरेन पावतलो. काजूमळ, काकोडें आनी शिरोडें हांगा धरण उबारपाचो प्रस्ताव आसा. तशेंच तिलारी धरणांत उदक सांठोवपाची तांक वाडोवपाचें महाराष्ट्र सरकारान मान्य केलां. तिलारी धरण प्रकल्पाच्या दुरुस्तीचें काम पुराय जालां. तिलारी धरण प्रकल्पांत गोंयचो वांटो 1465 कोटींचो आसा. साळावली धरणाच्या कालव्यांची दुरुस्ती जातली. साळ उदकाचो प्रकल्प डिसेंबर 2025 मेरेन पुराय जातलो. ह्या सगल्या गजालींक लागून फुडाराक फावो ते प्रमाणांत उदक उपलब्ध जातलें. चरावणें हांगा धरण उबारपाचो प्रस्ताव पोरणो आसा. हो प्रस्ताव फुडें वचूंक ना. नव्यान चरावणें धरणाच्या प्रस्तावाचो अभ्यास जातलो, अशें उदका पुरवण खात्याचे मंत्री सुभाष शिरोडकार हांणी सांगलें.
4 सहकारी सोसायट्यांचेर गुन्यांव नोंद
गैरवेव्हारांत आशिल्ल्या माशेल महिला अर्बन, विजनरी सयत 4 सहकारी सोसायट्यो/बँकां आड गुन्याव नोंद जाला. येता त्या 6 ते 8 म्हयन्यांत म्हत्वाचो निर्णय जातलो.
गोवा डेरी फायद्यांत
फाटल्या 6 म्हयन्यांत गोवा डेरी फायद्यांत आसा. शेतकारांक दरेका म्हयन्याचे 10 ते 15 तारखे मेरेन आधारभूत मोल मेळटलें. डिसेंबर 2025 मेरेन सगल्या सहकारी सोसायट्यांचें संगणकीकरण जातलें.
सहकार संबंधी प्रमाणपत्र अभ्यासक्रम सुरू करपा खातीर एखादी संस्था स्थापन जातली. सहकार वाठारांतल्या कर्मचाऱ्यां खातीर हो अभ्यासक्रम पुरक थारतलो. सहकारा बगर उद्धार ना, हे ब्रीद सगल्या राज्यांनी मान्य केलां. सहकार वाठाराच्या उदरगती खातीर संस्थांची विश्वासाहर्ता मोलादीक थारता, अशें सहकार मंत्री सुभाष शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
