भांगरभूंय | प्रतिनिधी
गजानन देसायः साहित्य चेतना अंकाचें लोकार्पण
भांगरभूंय । प्रतिनिधी
केरी- सत्तरीः साहित्यीक हो साहित्यीक आसता. साहित्यिकाक भाशेची मर्यादी आसची न्हय. साहित्य हें व्यक्त जावपाचें साधन आसता. गोंयांत साहित्य येता, पूण वाचनाची गोडी उणी जाता. प्रत्यक्ष पुस्तक घेवन वाचप वेंगळें आनी मोबायल वा लॅपटॉपा सारक्या साधनांचेर वाचप वेगळें, अशें कादंबरीकार प्रा. गजानन देसाय हांणी सांगलें. साहित्य मंथन सत्तरीच्या 14 व्या वर्धापन दीस कार्यावळींत ते मुखेल सोयरे म्हूण उलयताले.
वाळपयच्या सरकारी माध्यमीक विद्यालयांत आयोजीत केल्ले हे कार्यावळी वेळार माचयेर अध्यक्ष म्हूण शिक्षणतज्ञ तशेंच लेखक डॉ. नारायण देसाय, साहित्य मंथन सत्तरीचे अध्यक्ष काशीनाथ नायक, साहित्य चेतना अंकाची संपादक सारिका नायक हाजीर आशिल्ली.
प्रा. देसाय हांणी सांगलें, साहित्य मंथन सगळ्या भाशांतल्या लेखकांक एकठांय हाडपाचो यत्न करता. साहित्य मंथन ही संस्था भाशेच्या बंधनांत आडकना. लेखना खातीर खूब विशय आसात. कथा बीज आनी कादंबरीचो विशय सोदपाक पयस वचपाची गरज ना. तें आमचे भोंवतणीच आसतात. साहित्य लेखन करतना आमी बरयिल्लें साहित्य वाचकांक कळपाक जाय.
काशीनाथ नायक हांणी येवकार दिलो. लावण्या कुडतरकार आनी अवनी सावंत हांणी फुलां तुरे भेटयले. दिवली पेटोवन कार्यावळीची सुरवात जाली. उपरांत साहित्य चेतना अंकाचें लोकार्पण जालें.
संपादक सारिका नायक हांणी मनोगत उक्तायलें आनी अंका खातीर आदार केल्ल्या व्यक्तींचे उपकार मानले. साहित्य चेतना अंकांत जांचें साहित्य आस्पावलां त्या लेखकांक ह्या वेळार अंक भेट दिले. काशीनाथ नायक हांचे हस्तुकीं मानेस्तांक यादस्तीक चिन्नां भेटयलीं. संजय सालेलकार हांणी सुत्रसंचालन केलें जाल्यार महादेव गांवकार हांणी उपकार मानले.
हे कार्यावळी उपरांत राघोबा लवू पेडणेंकार हांचे अध्यक्षते खाला कविसंमेलन जालें. तातूंत सविता गिरोडकार, विशाल गांवस, सिद्धी पार्सेकार- कुडासकार, सिंधिया पार्सेकार, अस्मिता पांगम, लाडको कुडतरकार, सागर गांवस, विरा गोसावी, मनिषा गांवस, गजानन देसाय हांणी कविता सादर केल्यो.
साहित्य हो समाजाचो हारसोः डॉ. नारायण देसाय
विखाळपण पावित्र्यांत बदलपाची शक्त साहित्यांत आसता. भाशी ही संस्कृतीक घेवन मुखार वता. साहित्य हो समाजाचो हारसो सा. साहित्य आनी समाज वेगळो न्हय, अशें डॉ. नारायण देसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
